د مالیې وزارت نوماند وزیر او سرپرست د افغانستان په هکله د ۲۰۲۰ کال پراختیایې کنفرانس د جوړیدو په چارو کې د فنلند هیواد له ځانګړي استازي سره وکتل
د مالیې وزارت نوماند وزیر او سرپرست ښاغلي عبدالهادي ارغندیوال نن د غويي میاشتې په ٩ مه نېټه د افغانستان په هکله د ۲۰۲۰ کال پراختیایې کنفرانس جوړیدو په چارو کې د فنلند هیواد له ځانګړي استازي سره د ویډیو کنفرانس له لارې خبرې وکړې.
په دې خبرو کې دواړو لوریو په یاد کنفرانس کې د مرسته کوونکو په ژمنو او له دې کنفرانس څخه د افغانستان په غوښتنو، د دې کنفرانس جوړیدو لپاره د عملیاتي او لوجستیکي پلان په جوړیدو او د اړینو سندونو په ترتیبولو بحث او د نظرونو تبادله وکړه.
د ۲۰۲۰ کال پراختیایې کنفرانس لپاره د فنلند هیواد ځانګړي استازي وویل خوښ دې چې هیواد یې له افغانستان سره په ګډه د یاد کنفرانس کوربه توب کوي او زموږ هیله دا ده څو افغانستان په دې کنفرانس کې له مرسته کوونکو څخه زیاتې مالي ژمنې تر لاسه کړي او له دې مرستو څخه په ګټې اخیستنې سره افغانستان مالي ځان بسیاینې ته ورسیږي.
د مالیې وزارت سرپرست د افغانستان لپاره د ۲۰۲۰ کال پراختیایې کنفرانس جوړیدو څخه د فنلند هیواد له هر اړخیزو همکاریو مننه وکړه او زیاته یې کړه چې زما نخنیکي همکاران اوس مهال یاد کنفرانس ته د اړینو سندونو په ترتیت کار کوي او هیله مو دا ده چې یو بریالی کنفرانس ولرو.
د یادونې وړ ده چې ټاکل شوی ده د روان میلادي کال په وروستیو کې د افغانستان لپاره د ۲۰۲۰ کال پراختیایې کنفرانس د افغانستان او فنلند هیواد په ګډ کوربه توب په جینیوا ښار کې جوړ شي
