د مالیې وزارت نوماند وزیر او سرپرست د لوړو زده کړو وزارت له سرپرست سره د دې وزارت د یو شمېر پروژو په بودیجوي مسایلو خبرې وکړې
د مالیې وزارت نوماند وزیر او سرپرست ښاغلي عبدالهادي ارغندیوال نن د غبرګولي میاشتې په ۲۷ مه نېټه د لوړو زده کړو وزارت له سرپرست ښاغلي عبدالتواب بالاکرزي سره په مالیې وزارت کې وکتل او د لوړو زده کړو وزارت په بودیجوي موضوعاتو او د یو شمېر پروژو د طرح او ډیزاین په اړه یې ور سره بحث او د نظرونو تبادله وکړه.
په پیل کې د لوړو زده کړو وزارت سرپرست په بودیجوي موضوعاتو، د یو شمېر پروژو په طرح او ډیزاین او بودیجوي ستونزو په اړه خبرې وکړې. نوموړي زیاته کړه چې د لوړو زده کړو وزارت په پام کې لري چې یو شمېر تحصیلي بنسټونه، پوهنتونونه او اړوند اداري ودانۍ جوړې کړي، مالیې وزارت باید د نظر وړ بودیجه چمتو او له هغو تمویلوونکو سره چې په دې برخه کې یې د افغانستان له حکومت سره د همکارۍ ژمنه کړې مرستې جلب او ورسره خبرې وکړې څو هغوې خپلې ژمنې په دې برخه کې عملي کړي. د لوړو زده کړو وزارت سرپرست وویل چې د یادو بنسټونو او پوهنتونونو لپاره دې دوه ډوله طرحه ډیزاین د ګرمو او سړو سېمو لپاره جوړ شي او ډیزاینونه دې په نورو ولایتونو کې هم پلي شي.
د مالیې وزارت سرپرست وویل چې په افغانستان کې د کرونا ویروس خپریدو ته په پام سره زموږ اساسي لومړیتوب د کرونا ویروس او د دې ویروس له زیانونو سره مبارزه ده. نوموړي زیاته کړه هغه پیسې چې حکومت یې تر لاسه کوي له کرونا ویروس سره مبارزې ته یې ځانګړې کوي، له دې سره سره لوړې زده کړې ډیرې مهمې دي او د حکومت لومړیتوب جوړوي موږ هڅه کو څو شته امکاناتو ته په کتو سره په دې برخه کې لا تاسو سره همکاري وکړو.
د مالیې وزارت سرپرست وویل چې د پوهنتونونو او تحصیلي برخو د جوړیدو څرنګوالی باید د خلکو اړتیاو او د کار بازار له لومړیتوبونو سره ورته والی ولري او د زده کړې کیفیت معیاري او لوړ وي چې د لوړو زده کړو وزارت د سرپرست د تایید او موافقې وړ وګرځید.
د دې ناستې په پای کې پریکړه وشوه څو د مالیې وزارت د بودیجې لوی ریاست، د دې وزارت د مرسته انسجام اداره او د لوړو زده کړو وزارت تخنیکي ټیمونه دې ناسته وکړي او د یادو ودانیو د طرحې او ډیزاین د بودیجوي ستونزو د حل څرنګوالي او د مرسته کوونکو د مرسته جلبولو او همغږۍ په اړه دې بحث او خبرې وکړي.
