د راتلونکي مالي کال په ملي بودیجه کې د لوګر ولایت د خلکو اړتیا وو شاملولو په موخه له دوی سره د حکومت مشورتي ناسته وشوه
د ۱۴۰۰مالي کال په ملي بودیجه کې د لوګر ولایت د خلکو اړتیا وو شاملولو په موخه له دوی سره د حکومت مشورتي ناسته نن د وږې میاشتې په ۱۳ مه نېټه په انټرکانټیننټال هوټل کې جوړه شوه.
په دې ناسته کې د مالیې وزارت د بودیجې لوی رئیس، د لوګر والي، د ولایتي شورا، علماوو شورا او مدني ټولنو استازو او د لوګر ولایت عامو خلکو ګډون کړې وو.
د لوګر والي ښاغلي محمد اجمل شاپور وویل:" موږ له مالیې وزارت څخه د بودیجې جوړونې په پروسه کې د خلکو دخیلولو په برخه کې مننه کوو، دا یو ښه نوښت او غوره پیل دی چې له دي لارې خلک خپلې اړتیاوې او پراختیایې لومړیتوبه له حکومت شره شریکوي او حکومت هم مالي امکاناتو او د ټاکل شوې بودیجې ته پام سره یې په نظر کې نیسي."
نوموړي زیانه چې لوګر ولایت د کرنې او طبیعې سرچینو په برخه کې زیاته بودیجه جذبولی شي او له مالیې وزارت څخه یې غوښتنه وکړه چې د راتلوونکې مالي کال په بودیجه کې یادو برخو ته پاملرنه وکړي.
د مالیې وزارت د بودیجې لوی رئیس ښاغلي سید نصیر احمد په دې اړه وویل:" د راتلوونکي مالي کال په بودیجه کې د لویو پروژو تر څنګ د لوګرولایت لپاره ۷۵.۳ میلیونه افغانۍ د کوچنیو او ټولګټو پروژو لپاره په پام کې نیول شوي دي، هیله لرو چې د لوګر شریف خلک ټاکل شوې بودیجې ته په پام سره خپلې اړتیاوې او لومړیتوبونه له موږ سره شریک کړي څو وکولی شو دا اړتیاوې د راتلوونکې کال د ملي بودیجې په طرح کې شاملې کړو."
د مالیې وزارت د بودیجې لوی رئیس زیاته کړه چې موږ د بودیجې په ټاکلو کې د وګړو شمېر او د بیوزلۍ کچې ته پام کو او له خلکو سره د مشورتي ناستو موخه داده چې دوی د بودیجې جوړونې په پروسه او د سیمه ایزې حکومتولۍ په پیاوړتیا کې سهیم کړو.
د یادونې وړ ده چې د مالیې وزارت د تخنیکي ټیم له لوري په دې اړه ګډونوالو ته پریزنټیشن وړاندې شو او دوی ته یې لازم معلومات ورکړل. همداشان د لوګر ولایت د خلکو نظرونه، وړاندیزونه او اړتیاوې واوریدل شوې او پوښتنو ته یې د مالیې وزارت د بودیجې لوی رئیس له لوري ځوابونه ورکړل شول.
