د افغانستان مالي سکتور د پیاوړتیا او د اقتصاد د بیا رغونې لپاره د نړیوال بانک لخوا د ۱۰۰ میلیون ډالرو نوې مالي مرسته
د نړیوال بانک مدیره پلاوي لخوا نن د تلې میاشتې په ۸ مه نېټه په افغانستان کې د مالي سکتور د ثبات او له کوچنیو سوداګریزو فعالیتونو څخه د ملاتړ لپاره ۱۰۰ میلیون ډالره نوې مالي مرسته په داسې حال کې تصویب شوه چې اوس مهال دغه هېواد د کوويډ-۱۹ ویروس د ناوړه اقتصادي اغېزو څخه راوځي.
دغه وړیا مالي مرسته د نړیوالې پراختیا ادارې لخوا چې د نړۍ له خورا بېوزلو هېوادونو سره د نړیوال بانک د مرستو یوه برخه ده، چمتو شوې او ټاکل شوې چې "د افغانستان مالي سیستم د پیاوړتیا پروژې" له لارې د افغانستان بانک د وړتیا لوړونې او د مالي مقررارتو په تطبیق کې د دې بانک څارونکی رول پياوړی کولو او په دې برخه کې د اسانتیاوو برابرولو په برخه کې ولګول شي. دا پروژه به په ځانګړې توګه له افغانستان سره مرسته وکړي څو د بیمې لپاره د تضمین سیستم، یو شمېر مالي سیستمونه لکه د پورونو او عامه اعتباراتو ثبت، د وثایقو او رهني حقوقو ثبت پیاوړې کړي او په د افغانستان بانک کې د معلوماتي تکنالوژۍ سیستم په یو پرمختللي او مدرن سیستم واړوي. د دې پروژې تطبیق به د افغانستان د مالي نظام ثبات پياوړی کړي او د مالي مینځګړیتوب په برخه کې به یو شمېر اسانتیاوې رامنځته کړي.
دا پروژه به له مالیې وزارت سره مرسته وکړي څو د کوچنیو او منځنیو شرکتونو لپاره یو شمېر اسانتیاوې د پورونو او مالي سرچینو په برخه کې رامینځته کړي او په دې توګه به له هغوی سره تخنیکي مرستې زیاتې شي.
