د اسلام کلا بندر د طرحې او ډیزاین ارزونې ناسته وشوه
د مالیې وزارت سرپرست محمد خالد پاینده، په مشرۍ چې د دې وزارت د عوایدو او ګمرکونو مرستیال عالم شاه ابراهیمي، د مقام د دفتر عمومي رئیس عبدالخالق سرابي، د ګمرکونو عمومي رئیسې امنې احمدي، د عوایدو عمومي رئیس نصر الله دراني، د مقام سلاکار محمد اقا کوهستاني او یو شمېر رئیسانو ګډون کړی وو، د اسلام کلا بندر د طرحې او ډیزاین ارزونې ناسته وشوه.
په دې ناسته کې له نړیوالو معیارونو او د واحدې دریڅې له سیستم (Single Window System) سره سم د اسلام کلا بندر د طرحې او ډیزاین په تړاو څو اړخیزه خبرې او بحثونه وشول.
پرېکړه وشوه، څو د اسلام کلا بندر د لارې نقشې ښه کېدو په موخه له تخنیکي ټیم سره خبرې وشې او د ټرافیکو جریان له تخنیکي اړخه و ارزول شي.
د یادونې وړده، چې د اسلام کلا بندر جوړونه او رغونه به په دریو فازونو کې ترسره شي، په لومړي فاز کې به زېربنایي برخې لکه پارکینګ، کریړ شوي سړکونه او اسانتیاوې شاملې وي، چې د لومړي فاز چارې به په نږدې راتلونکي کې پیل شي.
