د مالیې وزارت سرپرست د شهزاده سرای صرافانو ته د امنیت او اسانتیاوو برابرولو ډاډ ورکړ
د مالیې وزارت سرپرست الحاج ملا هدایت الله بدري، د کابل د شهزاده سرای له صرافانو سره د خپل کار په دفتر کي ولیدل.
په دې لیدنه کي چي د مالیې وزارت د پالیسۍ مرستیال نذیر کبیري او د وزارت نورو استازو هم ګډون درلود، پرمهال يې د شهزاده سرای صرافانو د مالیې وزارت له سرپرست سره خپلي ستونزي، وړاندیزونه او راتلونکي پلانونه په مخامخ ډول شریک کړل.
د شهزاده سرای د صرافانو په استازيتوب امین جان خوستي او حاجي ځیرک ګډون کړی وو، چي د خپلو خبرو پرمهال يې د صرافانو د فعالیتونو او قوانینو يادونه وکړه، چي په وينا يې په دې برخه کي له تېر نظام څخه یو شمېر ستونزي ورپاته دي او ځیني قوانین یې له خپلو فعالیتونو سره په ټکر کي وبلل.
دغه راز صرافانو د نوي اسلامي حکومت له لوري دوئ ته د امنیت د ټینګښت، په ورځنۍ راکړه ـ ورکړه کي د افغانيو د ترویج او نورو اسانتیاوو رامنځته کولو په برخه کي خپله خوښي څرګنده او د مالیې وزارت مشرتابه ته یې په دې برخه کي له خپله اړخه د بشپړي همکارۍ ډاډ ورکړ.
د مالیې وزارت سرپرست الحاج ملا هدایت الله بدري صرافانو ته ډاډ ورکی، چي د افغانستان نوی حکومت شپه او ورځ په دې هڅه کي دی، ترڅو عامو خلکو او په ځانګړې توګه تجارانو او صنعت کارانو ته چي هیواد ته د مالي خدمتونو وړاندي کولو ستره هسته ده ځانګړې پاملرنه او پوره همکاري وکړي
الحاج ملا هدایت الله بدري، له صرافانو غوښتنه وکړه، چي په خپلو خدمتونو کي هیڅ راز کمی رانه ولي او له نوي نظام سره مرسته وکړي، ترڅو د هيواد اقتصادي ستونزي په ګډه هواري او اقتصادي غوړېدا رامنځته سي.
