مالیاتي محاسبینو ته د فعالیت د جواز ورکړي ازموینه واخیستل سوه
![خبر](/sites/default/files/2022-11/2.jpg)
مالیاتي محاسبینو ته د فعالیت د جواز ورکړي ازموینه نن د مالیې وزارت د عوایدو لوی ریاست لخوا د مالیې وزارت د ګمرکونو په ملي اکاډمۍ کي واخیستل سوه.
په دې پروګرام کي د عوایدو لوی رئیس معراج محمد "معراج" د ازمویني ګډونوالو ته د ښه راغلاست ترڅنګ وویل: د مالیې وزارت د عوایدو لوی ریاست ویاړي چي د ازادو او رڼو سیالیو له لاري د بیت المال د بنسټ او مالیاتی مسایلو د ساتني په موخه لوستي او پوه محاسبین جذبوي او هغوی ته د فعالیت د جواز ورکړي زمینه برابروي.
ورپسې د عوايدو د لوی رياست د حقوقي او پاليسي خدمتونو رئيس ندا محمد صديقي د دغې پروسې تخنيکي مسایل بيان کړل او زیاته یې کړه: د عوايدو لوی رياست د شفافیت په رڼا کي د مالياتي محاسبینو د ملاتړ او پیاوړتیا غوښتونکی دئ، د هیواد د مالیاتو په ډګر کي ستاسو شتون د غیر رسمي اقتصاد لمن راټولوي. تاسي به د مالیاتي محاسبینو په توګه د ځانګړي اهلیت، حقوقي مسؤلیت او د رسمي مهر درلودوونکي وئ.
![خبر](/sites/default/files/inline-images/1_19.jpg)
د یادوني وړده، چي د ازمويني د بهير د څارني په برخه کي د عوایدو لوی ریاست د مالياتو د تنفیذ او اطاعت پذیرۍ رئیس مولوي دوست محمد «حقاني» او د دې رياست نورو کارکوونکو هم ګډون کړی وو.