د نړیوال بانک له لوري د پراختیایي تمویلېدونکو پروژو د بررسۍ ناسته مالیه وزارت کې جوړه شوه
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي ډاکټر محمد همایون قیومي، په مشرۍ د نړیوال بانک له لوري د پراختیایي تمویلېدونکو پروژو د بررسۍ ناسته نن د کب میاشتې په ۱۲ مه نېټه مالیه وزارت کې د کلیو پراختیا او مخابراتو وزیرانو، د اوبو او برېښنا، لوړو زده کړو، سرپرست وزیرانو، د پوهنې وزارت مرستیال، د تخنیکي تعلیماتو رئیس، د اوسپنیزې پټلۍ ادارې رئیس، د کابل ښاروالۍ بېلابېلو ارګانونو، د اداري اصلاحاتو کمېسیون، د ښار جوړونې او اراضي وزارت، عامې روغتیا وزارت او نورو ادارو د استازو په ګډون، چې له نړیوال بانک څخه د پراختیایي پروژو لپاره مرسته ترلاسه کوي، جوړه شوه.
په دې ناسته کې وزارتونو او خپلواکو ادارو د پراختیایي پروژو پلي کولو په وړاندې د شته ستونزو په تړاو د نظرونو تبادله وکړه او د پروژو د حل لارې په څرنګوالې او د پروژو د اغېز په زیاتېدو ټینګار وشو.
د مالیې وزارت سرپرست ښاغلي قیومي، وویل، چې وزارتونه او خپلواکې ادارې دي له دې وروسته ترلاسه شوې مرستې په هغو پروژو ولګوي، چې تولیدي وي او د حکومت لپاره عواید ولري. نوموړي زیاته کړه، په عوایدي سیمو کې د دې پروژو په پلي کولو سره کولی شو تدریجي ځان بسیاینې او پایدارې اقتصادي ودې ته ورسېږو.
همدا شان د ناستې په پای کې پرېکړه وشوه، هغه پروژو چې د نړیوال بانک له لوري تموېلېږي، باید په ربعواره بڼه بررسي شي، څو د پروژو پلي کولو بهیر چټک شي.
