د ګمرکونو لوی رئیس کندوز ولایت ته رسمي سفر وکړ!
د ګمرکونو لوی رئیس الحاج مفتي عبدالمتین سعید د یوه پلاوي په مشرۍ کندوز ولایت ته رسمي سفر وکړ او هلته ئې د کندوز ګمرک د چارو د ارزوني تر څنګ د کندوز له والي مولوي نثار احمد نصرت او د یاد ولایت له یو شمېر سوداګرو سره جلا - جلا وکتل.
د ګمرکونو لوی رئیس د کندوز ولایت د شېرخان بندر له سرحدي ګمرک څخه د لیدني پر مهال د یاد ګمرک مسؤلینو او کارکوونکو ته د همکارانو او اړوندو ادارو تر منځ د ښې همغږۍ رامنځته کولو، پر خپل وخت سره د مراجعینو ستونزو ته د رسېدني او د سوداګریزو توکو د طی مراحلو د لا چټکتیا په برخو کي لازمي سپارښتني وکړې.
نوموړي د کندوز له والي سره په لیدنه کي د سوداګرۍ په لا ودي او د سوداګرو ستونزو ته د رسېدو په اړه هر اړخیز بحث او خبري وکړې.
د ګمرکونو لوی رئیس په دې سفر کي د کندوز ولایت له یو شمېر سوداګرو سره هم وکتل، چي په دې کتنه کي نوموړي د سوداګرو ستونزي واورېدلې او د ژر حل کېدو ډاډ ئې ورکړ.
د یادوني وړ ده، چي د ګمرکونو لوی رئیس له دې وړاندي هم بېلابېلو ولایتونو ته سفرونه کړي؛ څو د هیواد د ګمرکي چارو د ارزوني ترڅنګ د سوداګرو ستونزي هم له نږدې واوري او حل ئې کړي.
