تېره اوونۍ په بېلابېلو ولایتونو کي په زیاته کچه قاچاقي توکي نیول سوي دي!

د مالیې وزارت د ګمرکونو لوی ریاست د ګرځنده څارني کارکوونکو تېره اوونۍ د هرات، نیمروز او فراه ولایتونو په بېلابېلو سیمو کي په زیاته کچه قاچاقي توکي نیولي، چي قاچاق کوونکو غوښتل په پټه ئې افغانستان ته راوړي.
په نیول سویو توکو کي (۱۲۶۰۰) کیلو ګرامه مالګه، (۸۲۸۰) کیلو ګرامه چاکلېټ، (۴۸۳) کیلو ګرامه نباتي غوړي، (۳۰۰) کیلو ګرامه پلاستیکي کڅوړې، (۲۵۰۰) کیلو ګرامه ککاو، (۲۵۸۰) کیلو ګرامه تعمیراتي رنګ، (۵۱۰) کیلو ګرامه تشي بوجۍ، (۴۴۴) کیلو ګرامه شامپو، (۷۳۲) کیلو ګرامه رُب، (۱۲۰) کیلو ګرامه انساني درمل، (۲۴۰) کیلو ګرامه زراعتي درمل، (۲۴۰) کیلو ګرامه حیواني درمل، (۲۹۴) کیلو ګرامه مکروني، (۱۳۵) کیلو ګرامه وچې یا پوډري شیدې، (۷۲) کیلو ګرامه پروټین، (۱۵۲) کارټنه تاریخ تېر بسکویټ، (۳۰) کارټنه د مخ کریم او (۲۱) کارټنه ټینر شامل دي.
نیول سوي توکي او تورن کسان د نورو اجراآتو لپاره اړوندو ګمرکونو ته سپارل سوي دي.
د یادوني وړ ده، چي د مالیې وزارت د ګرځنده څارني کارکوونکي په ټول هیواد کي دوامداره فعالیت کوي او هیچا ته اجازه نه ور کوي، چي ممنوعه او قاچاقي توکي ولیږدوي