د مالیاتي تصفې او د غوره خدمتونو وړاندې کولو په موخه لویو مالیه ورکوونکو ریاست ته مرکز او ۵ ولایتونو د لویو شرکتونو لیږدلو په اړه د مالیې وزارت خبرتیا؛

د اقتصاد عالي شورای د دریمې ګڼې د ۱۳۹۷ کال د وري میاشتې ۱۴ مې نېټې د پرېکړې له مخې د لویو مالیه ورکوونکو لپاره د واحدې ادارې جوړیدل تائید شوي دي. چې له مخې یې هغه ټول لوی شرکتونه چې په مرکز او پنځو لویو ولایتونو کندهار، بلخ، هرات، ننګرهار او کندوز کې راجستر شوي دي او په ۱۳۹۶ مالي کال یې د پلور کچه ۱۵۰ میلیونه افغانۍ او یا له دې څخه زیات وي د مالیاتو په تصفیه کې د لا زیاتو اسانتیاوو، په مسلکي ډول د خدمتونو د وړاندې کولو، د دقیقې مالیې ټاکلو او د عوایدو راټولیدو بهیر د ښه والي په موخه په کابل کې د لویو مالیه ورکوونکو ریاست ولیږدول شي.

د دې تر څنګ د مالیه ورکوونکو لپاره د لا اسانتیا په موخه، د مالیې وزارت د عوایدو لوی ریاست د الکترونیکي اظهارلیکونو پروسه لا له وړاندې پیل کړې چې ټول شرکتونه کولی شي خپلې مالیاتي فورمې په ټاکلي وخت په خپلو دفترونو کې ډکې او د انټرنیټ له لارې یې د عوایدو په سیستم کې ثبت کړي.

د یادونې وړ ده چې د عوایدو لوی ریاست د سیستم له لارې د مالیاتي فورمو د ډکولو او مالیه ورکوونکي ته د یوزر جوړولو په موخه روزنیز ورکشاپ هره سه شنبه د ورځې له ۹:۰۰ څخه تر ۱۲:۰۰ بجو جوړوي او ټول مالیه ورکوونکي کولی شي په دې ورکشاپونو کې ګډون وکړي. د لا زیاتو معلوماتو لپاره ټول مالیه ورکوونکي کولی شي د عوایدو لوی ریاست د خدمتونو مرکز له 1000 شمېرې او یا هم په 0202924658 شمېرې اړیکه ونیسي.