د مالیې وزیر د سوداګرۍ او پانګوني خوني له مسئولینو او د درملو را واردوونکو سوداګرو سره وکتل

د لړم۲۵مه۱۴۰۴هـ.ل

د مالیې وزیر الحاج ملا محمد ناصر اخوند د افغانستان د سوداګرۍ او پانګوني خوني د مدیره پلاوي له غړي خان جان الکوزي او هیواد ته د درملو را واردوونکو یو شمېر سوداګرو سره وکتل.
په دې کتنه کي د پاکستان پر ځای پر بدیلو سوداګریزو لارو، له بدیلو لارو څخه د راواردېدونکو درملو له پاره په ګمرکي اسانتیاوو او د سوداګرو پر احتمالي ستونزو خبري وسوې.
د هیواد د سوداګرۍ او پانګوني خوني مسئولینو او د درملو را واردوونکو سوداګرو، په ګمرکونو کي رامنځته سوي اسانتیاوي وستایلې او له بدیلو لارو څخه د سوداګریزو اموالو د پړاوونو ترسره کولو په برخه کي ئې د لا ډېرو اسانتیاوو او همکاریو غوښتنه وکړه.
د مالیې وزیر د هیواد د سوداګرۍ او پانګوني خوني مسئولینو او د درملو راواردوونکو سوداګرو ته ډاډ ورکړ، چي د تل په څېر به د دوی ملاتړ کوي او په اړوندو برخو کي به اسانتیاوي نوري هم زیاتي کړي او احتمالي ستونزي به ئې پر وخت ور حل کوي.