د مستوفیتونو له مسئولینو سره انلاین ناسته وشوه

د غبرګولي ۱۸مه ۱۴۰۵هـ.ل

د مالیې وزارت د عوایدو لوی ریاست د عملیاتي مرستیال په مشرۍ او د دغه ریاست تخنیکي مرستیال، اړوند رئیسانو، آمرینو او د تنفیذ او مالیاتي اطاعت پذیرۍ عمومي مدیرانو په ګډون د ولایتي مستوفیتونو له مسئولینو سره د کاري ستونزو د حل او د چارو د لا ښه والي په موخه د ګمرکونو او عوایدو معینیت په تالار کې انلاین ناسته وشوه.
د ناستې په پیل کې د عوایدو عملیاتي مرستیال د دغه ډول ناستو پر ارزښت خبرې وکړې او زیاته یې کړه، چې یادې ناستې د یوه منظم مهالوېش له مخې د اداري چارو د غوره والې، همغږۍ او شته ستونزو د حل په موخه ترسره کېږي.
وروسته بیا د E-Filing سیسټم د اغېزمنې کارونې، غوره تطبیق او په سګتاس سیسټم کې د عمومي مدیرانو له پاره د صلاحیتونو د وېش په اړه معلومات وړاندې او همداراز د سوداګرو او خصوصي سکټور د ملاتړ او اسانتیاوو د رامنځته کولو په موخه د مشرتابه د پرېکړو د تطبیق پر لارو چارو رڼا واچول شوه.
د ناستې په لړ کې د مستوفیتونو د تحلیل خطر پلاوو د فعالیتونو راپور هم وړاندې او د اصنافو او سهم کرایې د مالیاتي باقیاتو په اړه یې تفصیلي معلومات له ګډونوالو سره شریک شول.
د ناستې په پای کې د وروستۍ بررسۍ د بشپړو شویو دوسیو د تړلو، په ټایس سیسټم کي د قراردادونو د ثبت پر وړاندې د موجوده ستونزو، د بانکي حسابونو د تعلیق او يو شمېر نورو اړینو موضوعاتو باندې بحث وشو، چې وروسته بیا مستوفي صاحبانو خپل نظرونه، وړاندیزونه، کاري ستونزي او لازمې سپارښتنې هم شریکي کړې.
د یادونې وړ ده، چي د عوایدو لوی ریاست د مستوفیتونو د کاري ستونزو او پرمختګونو د ارزونې په موخه په هرو پنځلسو ورځو کې له مستوفیتونو سره انلاین ناسته کوي.