د چارواکو ژوندلیک

د مالیې وزارت د سرپرست او نوماند وزیر ښاغلی عبدالهادي ارغندیوال

ښاغلی عبدالهادي ارغندیوال په ۱۳۳۱ کال کې د کابل ولایت پغمان ولسوالۍ په ارغندۍ سیمه کې دې نړۍ ته سترګې وغړولې. نوموړی د کابل ښار غازي لېسه کې د خپلو منځنیو او ثانوي زده کړو تر بشپړولو وروسته د کانکور ازموینې له لارې د کابل پوهتنون اقتصاد پوهنځي ته بریالی او په ۱۳۵۵ کال کې یې له یادې څانګېد لیسانس په کچه سند تر لاسه کړ. 

ښاغلي ارغندیوال د خپل کاري ژوند د پیل په درشل کې په ۱۳۵۶ کال کې د پلان وزارت د صنایعو د پلان جوړونې په برخه کې دنده پیل کړه. نوموړی د غوایي میاشتې اوومې نیټې له کمونیستي کوتاه وروسته په ۱۳۵۷ کال کې د نورو هېواداوالو په څېر له خپل ټاټوبي کډوال او د روسي ښکیلاک په وړاندې افغان جهاد له صفوفو سره یو ځای شو.

 ښاغلي ارغندیوال د خپلو ملي او مبارزاتي فعالیتونو تر څنګ د افغانستان اسلامي حزب د استازي په توګه د لوړو زده کړو تر لاسه کولو او همغږۍ په موخه د امریکا متحده ایالتونو ته سفر وکړ. په دغه موده نوموړي د مدیریت او د سیستمونو د تحلیل په نرم افزار(سافټ ویر) برخه ځانګړې زدکړې ترسره کړلې. ښاغلي ارغندیوال د جهاد ارزښت او په هیواد کې د برلاسو ستونزمنو شرائطو په وړاندې د خپل ملي او اسلامي رسالت په درک سره و نشو کړی چې د امریکې متحده ایالتونو کې خپلې لوړې زده کړې پای ته ورسوي، له همدې امله نوموړی په بیړنۍ توګه هیواد ته راستون او د حزب اسلامي د استازي او د مجاهدینو د موقت حکومت د نړیوالو اړیکو مسئولیت یې په غاړه واخیست.

ښاغلي ارغندیوال د کمونیستي رژیم له ماتې وړاندې د اسلامي حزب د مالي برخې مسئولیت په غاړه درلود او د مجاهدینو دولت له جوړیدو وروسته کابل ته را ستون او د طالبانو لاس ته د کابل لویدلو تر مهاله، د شهید استاد برهان الدین رباني په مشرۍ د افغانستان اسلامي دولت د مالیې وزیر په توګه دنده تر سره کړې ده.

د طالبانو ژریم له نسکوریدو وروسته په ۱۳۸۵ کال کې ښاغلي ارغندیوال د ولسي او قومي چارو په برخه کې د پخواني ولسمشر ښاغلي حامد کرزي د سلاکار په توګه خدمت کړی او په ۱۳۸۸ کال کې له ولسې جرګې د باور رایې تر اخیستلو وروسته د ښاغلي کرزي په کابینه کې د اقتصاد وزیر په توګه دنده تر سره کړې ده.

ښاغلی ارغندیوال د ۱۳۹۹ کال حمل د میاشتې په ۱۲ مه نیټه د ولسمشرۍ عالي مقام د حکم له مخې د مالیې وزارت نوماند وزیر او سرپرست په توګه وګمارل شو. نوموړی په پښتو، دري او انګلیسي ژبو پوره تسلط لري او په عربي او اردو ژبو نسبي خبرې کولی شي

 د مالیې وزارت اداري مرستیال عبدالحبیب ځدراڼ

ښاغلی عبدالحبیب ځدراڼ، په مدیریتي، مالي، حسابدارۍ، تدارکاتو او بانکدارۍ په چارو کې ښې تجربې لري او له تمویلوونکو سره پراخې اړیکې لري او په ورته وخت کې یې په دولتي ادارو، د تمویلوونکو له  ادارو او خصوصي سکټور سره دندې ترسره کړي دي. نوموړي د پاکستان پنجاب له پوهنتون څخه فارغ شوی او ماسټري یې له تخصص سره په مالي چارو کې ترلاسه کړې ده. نوموړی له دې وړاندي د افغانستان زیمنس شرکت سوداګرۍ مدیر، د دفتر رئیس او د نوي کابل ښار خپلواک بورډ د مالي او تدارکاتو رئیس په توګه، د دې ترڅنګ نورو شرکتونو او نړیوالو مؤسسو کې دندې ترسره کړې دي. داراز؛ نوموړی د مالیې وزارت د پراختیایي پروژو د رئیس او بودیجې لوی رئیس د ستر سلاکار په صفت په دندو بوخت وو.

ښاغلي ځدراڼ، د جاپان پراختیایي ادارې (جایکا) د یوه مخکښ سلاکار او د نوی کابل ښار پراختیا خپلواک بورډ ستر مالي مدیر په توګه خدمت کړی. هغه د پانګې او تمویلوونکو د ملاتړ جذبولو په موخه خپله اړونده اداره په ګڼو نړیوالو کنفرانسونو او سیمینارونو کې معرفي او له نړیوالو تمویلوونکو لکه (د پیسو نړیوال صندوق، نړیوال بانک، د جاپان نړیواله پراختیایي اداره، د اسیا پراختیایي بانک، د امریکا متحده ایالاتونو پراختیایي اداره، د کوریا د همکاریو پراختیایي اداره، د اسلامي پراختیای بانک...) سره یې تعامل وکړ. د افغانستان د حکومت په عامه مالي مدیریت کې د نوموړي تجربې د پاملرنې وړ دي.

نوموړی په ۱۳۹۵ کال کې د مالیې وزارت سترو مالیه ورکوونکو رئیس په توګه وټاکل شو او ورپسې د عوایدو لوی رئیس په صفت و ګمارل شو. ښاغلی ځدراڼ، اوس مهال اداري مرستیال او د امنیتي او دفاعي چارو د لګښتونو د سپما په برخه کې د مالیې وزیر ستر سلاکار په توګه دنده ترسره کوي.

د مالیې وزارت اداري مرستیال محمد اسماعیل رحیمي 

محمد اسماعیل رحیمي د محمد رحیم زوی په (۱۳۵۵) کې په کابل ښار کې نړۍ ته سترګې غړولې دي او له حبیبیې لیسې تر فارغېدو وروسته یې لوړې زده کړې د بلخ پوهنتون په طب پوهنځي کې بشپړې کړې دي. وروسته یې د امریکا متحده ایالاتو په ولیمز کالج کې د اقتصادي پالیسۍ په برخه کې ماسټري کړې او بله ماسټري یې د کابل ښار د مریم رشیدخان په پوهنتون کې د ادارې او تجارت په برخه کې پای ته رسولې ده.

نوموړی له (۱۳۸۰) څخه تر (۱۳۸۳) پورې د ماشومانو او نوو ځوانانو د پراختیايي پروګرام (YCDP) سیمه ییز مدیر و. وروسته د راپور ورکولو او اطلاعاتو امر او څه موده وروسته یې د ملګرو ملتونو د اسکان په ساحوي دفتر کې د سپما او پانګونې د مسوول په توګه دنده ترسره کړې ده.

په (۱۳۸۶) کې یې د ولسمشرۍ مانۍ په اقتصادي مشاوریت کې د سکتوري همغږي کوونکي او د افغانستان د ملي پراختیا د ستراتيژۍ په دارالانشا کې دنده ترسره کړې ده. وروسته په (۱۳۸۸) کې په اقتصاد وزارت کې د افغانستان د ملي پراختیا د ستراتيژۍ د پالیسۍ او نظارت عمومي رییس شو او پنځه کاله وروسته د افغانستان د اسلامي جمهوري ریاست د ولسمشر د حکم پر اساس د اقتصاد وزارت مسلکي مرستیال وټاکل شو.

نوموړی پر دري، پښتو او انګلیسي ژبو بشپړ تسلط لري او د یادونې وړ ده چې په ترسره کړو چارو کې یې ډېره شایستګي، نوښت او وړتیا ښودلې ده چې د ارزښتمنو او مستعدانه خدمتونو له امله د افغانستان د اسلامي جمهوریت د جمهور رییس لخوا لومړی درجه ستاینلیک ورکړل شوی دی.

ښاغلي رحیمي په دغه لړ کې ګڼې او ارزښتمنې مقالې او نور مطالب نشر کړي چې ځينې یې دا دي:

اوسنی نړیوال بحران او د پراختیا په حال کې هېوادونو ځواب

د دولت اغېزناکي او په ټولنیز خوندیتوب کې یې مناسبه لاسوهنه

د ټولنې پر اساس د ټولنیز امنیت د شبکې لاره (د افغانستان د ملي پیوستون پروګرام او ټولنیز خوندیتوب)

د ملي پیوستون اجرايي بریا او محدودیتونه

ټولنیز خوندیتوب او دوامداره وده

ښاغلي رحیمې د دې تر څنګ د مالیزیا د ارزونې د مرکز Malaysian Evaluation Society  او څو نورو نړیوالو او سیمه ییزو سازمانونو افتخاري غړیتوب لري.