د دعوت او ارشاد ریاست سره د مالیې وزارت د کارکوونکو د همکارۍ په موخه ناسته ترسره سوه
دعوت او ارشاد ریاست سره د مالیې وزارت د کارکوونکو د همکارۍ او د دې ادارې فعالیتونو او ارزښتناکو اصلاحي پروګرامونو ته د پاملرني په موخه ناسته د مالیې وزارت په جومات کي ترسره سوه.
په دې غونډه کي د مالیې وزیر الحاج ملا محمد ناصر اخند، د مالیې وزارت اداري معین مولوي حمدالله زاهد، د دعوت او ارشاد لوی رئیس شیخ الحدیث مولوي محمد هاشم شهید ورور او د مالیې وزارت رئیسانو او کارکوونکو ګډون کړی وو.
ناسته چي د هېواد د نامتو قاری فضل الحق حقاني د مبارکو ایاتونو په تلاوت سره پیل سوه، د مالیې وزارت د تدارکاتو رئیس مولوي عتیق الله کریمي د ناستي د اجنډا د تشریح تر څنګ وویل، چي د دې ناستي موخه د یوه اسلامي دولت د قانون او د هغه د پلي کولو پوهاوی دی، چي د اسلامي شریعت پر بنسټ د اسلامي امت لپاره د پیغمبر (ص) له وخته رامنځته سوی دی.
ورپسې د دعوت او ارشاد لوی رئیس شیخ الحدیث مولوي محمد هاشم شهید ورور، د غونډې ګډونوالو ته په خپلو خبرو کي وویل، چي دا اداره د اسلامي امارت د عالیقدر امیرالمؤمنین (حفظه الله) د فرمان له مخي د شرعي احکامو د تبلیغ او تطبیق دنده پر غاړه لري. د دعوت او ارشاد اداره هڅه کوي، چي د دولتي کارکوونکو د ديني پوهي کچه لوړه کړي او په هيواد کي ديني ارزښتونه بنسټيز کړي. هغه زیاته کړه، د دغه فرمان له مخي هغه کسان چي د افغانستان د اسلامي امارت په ادارو کي کار کوي مکلف دي، چي خپل صورت او سیرت د اسلام د ستر پیغمبر (ص) سره سم عیار کړي او همدارنګه لمونځونه په جماعت وکړي او له ټولو دیني قوانینو چي د الله (ج) فرمان دی، اطاعت وکړي.
د مالیې وزارت اداري معین مولوي حمدالله زاهد د غونډي د ګډونوالو په ځانګړې توګه د دعوت او ارشاد پلاوي له راتګ څخه مننه وکړه او زیاته یې کړه، چي له کلونو راهیسي باطلو نظامونو هڅه کړې ترڅو د دین په نوم خلک له دین څخه بېل کړي او د دین ریښې په تېشه ووهي. د اسلامي امارت له واکمنۍ سره سم د چارو غوره والی د مومنانو د اصلاح په موخه ښکاره او څرګند دی. د سیاسي پیکار د یوه ډول په توګه هر مسلمان فرد باید د اسلامي امارت د مشر فرمان او د اسلامي امارت د قوانینو اطاعت وکړي.
غونډه د مالیې وزارت د دعوت او ارشاد ریاست مدرس مفتي نثار احمد هاشمي په دعایه پای ته ورسېده.
