تېره اوونۍ د هیواد په بېلابېلو ولایتونو کي په زیاته اندازه قاچاقي توکي نیول سوي دي!
د مالیې وزارت د ګمرکونو لوی ریاست د ګرځنده څارني کارکوونکو تېره اوونۍ د نیمروز، کندهار، فراه، هلمند او ننګرهار ولایتونو په بېلابېلو سیمو کي په زیاته اندازه قاچاقي توکي نیولي دي، چي قاچاق کوونکو غوښتل په پټه ئې افغانستان ته راوړي.
په نیول سویو توکو کي (۲۲،۷) ټنه چاکلېټ، (۱۱،۱) ټنه درمل، (۱۳) ټنه ګوړه، (۱۰،۸) ټنه مالګه، (۵) ټنه خام نخود، (۱۱۲۵) کیلو ګرامه وچي شیدې، (۱۰۰۰) کیلو ګرامه یوځل مصرف لوښي، (۹۵۱) کیلو ګرامه تشي بوجۍ، (۵۵۰) کیلو ګرامه تنباکو، (۶۴۰) کیلو ګرامه کاچوغي، (۳۱۰) کیلو ګرامه رُب، (۲۴۰) کیلو ګرامه رخت باب، (۱۱۰) کیلو ګرامه بنجاره او (۸۰) کیلو ګرامه رانجه شامل دي.
نیول سوي توکي او تورن کسان د نورو اجراآتو لپاره اړوندو ګمرکونو ته سپارل سوي دي.
د یادوني وړ ده، چي د مالیې وزارت د ګرځنده څارني کارکوونکي په ټول هیواد کي ګرځنده څارني کوي او هیچا ته اجازه نه ورکوي، چي ممنوعه او قاچاقي توکي ولېږدوي.
