د بیهقي سوداګریز مارکېټ د پروژې تړون لاسلیک سو!
د غویي ۳۰مه ۱۴۰۴هـ.ل
د بیهقي سوداګریز مارکېټ د پروژې تړونلیک د مالیې وزارت اداري معین مولوي دوست محمد مخلص، د اطلاعاتو او کلتور وزیر مولوي خیرالله خیرخواه، د چارو ادارې لوی رئیس شیخ الحدیث مولوي نورالحق انور او د فقیر محمد رحماني ودانیز شرکت استازي په ګډون د چارو ادارې د غونډو په تالار کي لاسلیک سو.
دغه مارکېټ، چي د کابل ښار لومړۍ ناحیې اړوند منډیي سیمه کي موقعیت لري د مالیې او د اطلاعاتو او کلتور وزارتونو ګډ جایداد دئ او ټول مساحت ئې (۸۰۲)مترمربع دئ، چي (۳۶۰)مترمربع مساحت ئې د مالیې وزارت اړوند او (۴۴۲)مترمربع ئې د اطلاعاتو او کلتور وزارت پوري تړاو لري.
د تړون له مخي یاد جایداد به د فقیر محمد رحماني ودانیز او سړک جوړوني شرکت له لوري د (۱) کال په موده په (۲)پوړونو کي د (۳۰)میلیونه افغانیو په پانګوني سره جوړېږي، چي (۶۰)سلنه ګټه به ئې امارت او د (۸) کلونو له پاره به (۴۰) سلنه ګټه شرکت ته ورکول کېږي.
