د ملي بودیجې عمومي ریاست تخنیکي ټیم د هیواد (۱۶) ولایتونو ته سفر وکړ
د لېندۍ ۹مه ۱۴۰۴هـ.ل
د مالیې وزارت د ملي بودیجې عمومي ریاست تخنیکي ټیم د هیواد (۱۶) ولایتونو (بامیان، نورستان، کنړ، بدخشان، تخار، کندوز، جوزجان، سرپل، فاریاب، بلخ، نیمروز، فراه، هرات، سمنګان، بغلان، او پروان) ته د خپلو رسمي سفرونو په لړ کي د دغو ولایتونو د مستوفیت کارکوونکو، د دویمي واحدونو او ښاروالیو مالي مسئولینو ته (د ملي بودیجې د ترتیب او اجراء) تر عنوان لاندي روزنیز ورکشاپونه ترسره کړل.
د دغه روزنیزو ورکشاپونو په ترڅ کي، چي په هر ولایت کي په جلا جلا ډول ترسره سول، ګډونوالو ته د عامه مالي چارو، ادارې او د بودیجې د ارزښت، په ولایتونو کي د ملي بودیجې غوره ترتیب، د بودیجوي کارېدونکو اصطلاحاتو د پېژندني، د عمومي بودیجې د ترتیب، ولایتي بودیجې جوړوني، د ښاروالیو د بودیجې، د ملي بودیجې د اجراء او یو شمېر نورو اړوندو موضوعاتو په تړاو هر اړخیز معلومات وړاندي سول.
د یادو ورکشاپونو په پای کي ګډونوالو هم په خپل وار سره خپل نظریات، وړاندیزونه او ستونزي شریکي کړې، چي د اړوندو مسئولینو له لوري ورته د ژر رسېدني او پوره همکارۍ ډاډ ورکړل سو.
هېره دي نه وي، چي د مالیې وزارت تل په دې هڅه کي دئ، چي د ملي بودیجې د غوره ترتیب او پلي کولو په موخه د عامه پوهاوي او ظرفیت لوړوني ورته روزنیز پروګرامونه لا وغځوي.
