د مستوفیتونو د خدمتونو وړاندي کولو آمریتونو د تېرو درېیو ربعو عوایدي وضعیت وارزول سو
د سلواغې۸مه ۱۴۰۴هـ.ل
د مالیې وزارت د عوایدو لوی رئیس الحاج مولوي سفر محمد سحر په مشرۍ د مستوفیتونو د خدمتونو وړاندي کولو آمریتونو د روان (۱۴۰۴)هـ.ل کال د تېرو درېیو ربعو (۹ میاشتو) د عوایدي وضعیت د ارزوني آنلاین ناسته د عوایدو او ګمرکونو معینیت د غونډو په تالار کي وسوه.
په دغه ناسته کي د عوایدو لوی رئیس، د عوایدو د مستوفیتونو مرستیال، مستوفيانو، اړوندو رئیسانو او تخنیکي غړو او د مستوفیتونو د خدمتونو وړاندي کولو آمرینو ګډون کړی وو.
د ناستي په لړ کي د ولایتونو د عوایدو د پراختیا او همغږۍ رئیس مفتي عبدالغفار سلیم په خپلو خبرو کي د هیواد د عوایدو د اوسني وضعیت په اړه هر اړخیز معلومات له ګډونوالو سره شریک کړل.
وروسته بیا د مستوفیتونو د خدمتونو وړاندي کولو آمریتونو د تېرو درېیو ربعو عوایدي وضعیت د ټاکل سویو عوایدي اهدافو پر بنسټ وارزول سو، چي له مخي ئې یاد آمریتونه توانېدلي دي، چي له ټاکل سویو اهدافو څخه زیات عواید راټول کړي.
ورپسې د مالیه ورکوونکو د خدمتونو رئیس مولوي اسدالله ساجد، په مرکز او ولایتونو کي د خدمتونو وړاندي کولو آمریتونو له لوري د یو شان پر وخت او معیاري خدمتونو د وړاندي کولو پر اهمیت ټینګار وکړ او له ګډونوالو ئې وغوښتل، چي له مرکزي ادارو سره په همغږۍ مراجعینو ته معیاري خدمتونه وړاندي کړي.
د ناستي په پای کي د ګډونوالو پوښتني، نظریات او ستونزي واورېدل سوې او د لازمي همکارۍ ډاډ ورکړل سو.
