د مالیې وزارت سرپرست د تاجیکستان جمهوریت د مالیې او ترانسپورټ له وزیراتو سره په بېلابیلو کتنو کې د دواړو هیوادو تر منځ د اقتصادي او سوداګرۍ اړیکو د لا پیاوړي کولو او پراختیا باندې ټینګار وکړ
د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، نن د چنګاښ میاشتې په ۱۳مه نېټه د افغانستان او تاجیکستان تر منځ د اقتصادي او سوداګرۍ بین الحکومتي ګډ کمېسیون د اوومې ناستې په څنډه کې د تاجیکستان هیواد د مالیې وزیر ښاغلي قهار زاده فیض الدین ستار او د یاد هیواد د ترانسپورټ وزیر ښاغلي خدایار زاده خدایار ذوقی بیک سره جلا جلا ناستې وکړې.
په دې ناستو کې چې د دواړو هیوادونو لوړ پوړو پلاوو هم ګډون درلود، د مالیې وزارت سرپرست د دواړو هیوادونو تر منځ د اوومې اقتصادي او سوادګرۍ بین الحکومتي ناستې له کوربه توب څخه مننه وکړه او له دوی سره یې د دواړو هیوادو تر منځ د اقتصادي او سوداګرۍ اړیکو د لا پیاوړي کولو او پراختیا، د اقتصادي ودې لپاره په ترانسپورټي اړیکو، سیمه اییزې نښلونې، د دواړو هیوادونو تر منځ د سوداګرۍ او ترانزیټ د ودې په موخه د ریل پټلۍ له لارې له تاجیکستان سره د افغانستان په نښلونې، په خپل وخت سره د هوکړه لیکونو د مواردو د پلي کولو په موخه په سمه توګه د پروتوکولونو په زمان بندي، افغان موټر چلونکو لپاره د ویزو په اجراء کولو، د دواړو هیوادونو د موسمي تولیداتو لپاره په ګمرکي تعرفو، د سېمه اییزو دهلیزونو په جوړیدو، جنوبي اسیا ته د افغانستان له لارې د تاجیکستان د برېښنا انرژۍ په ترانزیټ، په تاجیکستان کې په ترانسپورټي فیسونو او یو شمېر نورو مسایلو هر اړخیز بحث وکړاو په اړه یې لازمې پریکړې وشوې.
