سرپرست وزارت مالیه طی ملاقات های جداگانه با وزراء مالیه و ترانسپورت جمهوری تاجیکستان روی تحکیم و گسترش هر چه بیشتر روابط اقتصادی و تجارتی دو کشور تأکید نمود
محترم پروفیسور محمد همایون قیومی، سرپرست وزارت مالیه و مشاور ارشد مقام عالی ریاست جمهوری در امور زیربناء امروز مورخ ۱۳ سرطان ۱۳۹۸ در حاشیه کمیسیون مشترک بین الحکومتی میان جمهوری اسلامی افغانستان و تاجیکستان با محترم قهار زاده فیض الدین ستار، وزیر مالیه و محترم خدایار زاده خدایار ذوقی بیک، وزیر ترانسپورت جمهوری تاجیکستان بطور جداگانه ملاقات نمود.
در این ملاقات ها که هیئت عالیرتبۀ هر دو جانب اشتراک داشتند، سرپرست وزارت مالیه از میزبانی تاجیکستان بخاطر برگزاری هفتمین کمیسیون دوجانبه تشکر نموده و با ایشان در رابطه به تحکیم و گسترش هر چه بیشتر روابط اقتصادی و تجارتی میان دو کشور، روابط ترانسپورتی برای رشد اقتصادی، اتصال منطقوی، وصل افغانستان با تاجیکستان از طریق خط آهن جهت رشد تجارت و ترانزیت هر دو کشور، زمان بندی دقیق پروتوکول ها جهت عملی سازی موارد موافقت شده در وقت و زمان معینه آن، اجرای ویزه به دریوران افغان، تعرفه گمرکی بخاطر تولیدات موسمی هر دو کشور، ایجاد دهلیز های منطقوی، ترانزیت انرژی برق تاجکستان از طریق ا فغانستان به آسیای جنوبی، فیس ترانسپورتی در تاجیکستان و دیگر مسایل مرتبط بحث همه جانبه نموده و تصامیم لازم اتخاذ نمودند.
