د چارو د لا همغږۍ او پرمختګ په موخه د اداري معینیت د رهبرۍ څلورمه ناسته وشوه
د غویي ۲۲مه۱۴۰۵ هـ.ل
د مالیې وزارت د اداري معین مولوي دوست محمد مخلص په مشرۍ، په روان (۱۴۴۷) هـ ق کال کې د اداري معینیت د رهبرۍ څلورمه ناسته د اړوندو رئیسانو په ګډون د دغه معینیت د غونډو په تالار کې وشوه.
د ناستې په پیل کې د تېرې ناستې موضوعات وارزول شول، چې له مخې یې ډېریو موضوعاتو ته پر وخت رسېدنه شوې وه. سربېره پر دې په یاده ناسته کې د امارتي املاکو د سیسټم پر عصري کولو، د ریاستونو پر کلني پلان او میاشتنيو کاري راپورونو، د ځینو جایدادونو د کرايې کمولو، د بهرنیو مجلسونو د راپور ورکولو او یو شمېر نورو موضوعاتو په تړاو هر اړخیز بحث او اړینې پرېکړې وشوې.
همداراز اړوندو ریاستونو شته ستونزې او وړاندیزونه هم شریک کړل، چې د رهبرۍ له لوري ورته د پر وخت رسېدو ډاډ ورکړل شو.
د یادونې وړ ده، چې د مالیې وزارت اداري معینیت د رهبرۍ ناستې د چارو د لا ښه والي او اغېزمنتوب په موخه ترسره کېږي، چې دغه لړۍ به په راتلونکي کې هم دوام ومومي.
