افغانستان د لاسي صنایعو دولتي شرکت د فرهنګ ښکارندوی او عوایدي منبع
د افغانستان د لاسي صنایعو دولتي شرکت، چي په (۱۳۴۵ل) کال کي تاسیس سوی، په لومړیو کي د کانونو وزارت په چوکاټ د یوې تصدۍ په توګه او وروسته د سوداګرۍ وزارت په چوکاټ کي د سهامي مختلط شرکت په توګه ئې فعالیت کوی. اوس مهال دغه شرکت د دولتي شرکتونو عمومي ریاست تر اثر لاندي د مالیې وزارت په چوکاټ کي خپل فعالیتونه پر مخ بیايي.
دغه شرکت د غالیو، ګیلم، فرشونو، شیشه ګرۍ، منبت کارۍ، میناکارۍ، سفالونو او د لرګینو او ربړینو بېلابېلو لاسي صنایعو په برخه کي فعالیت کوي او له همدې لاري ګڼو هيوادوالو په ځانګړي ډول ښځینه وو ته کاري زمینه برابروي او د کورنیو اقتصادي وضیعتونو په غوره والي کي اغېزمن رول لوبوي.
د افغانستان د لاسي صنایعو دولتي شرکت مالي مرستیال، غلام نبي ناجي وايي: د افغانستان لاسي صنایع د هيواد د فرهنګ، تاریخ او تمدن ښکارندوی او یوه غوره عوایدي منبع ګڼل کېږي، چي د افغانستان د خلکو د اقتصادي وضیعت د ښه والي ترڅنګ د توریسم او سیلانیانو په جذب کي هم مثبت اغېز لري؛ خو په تېرو ۲۰ کلونو کي د دولت نه پاملرنه او د کارکوونکو لپاره د یوه جامع سیسټم نه شتون له امله دغه صنایع د پام وړ پراختیا ونه موندله.
د اسلامي امارت له واکمنېدو سره سم د مالیې وزارت د ځانګړې پاملرني له مخي د کوچنیو تشبثاتو د پراختیا او توسعه په ځانګړي ډول لاسي صنایعو برخه کي هیله مندي داده، چي د افغانستان لاسي صنایع به په کور دننه او نړیوال بازارونو کي وځلېږي. لاسي صنایعو ته پاملرنه نه یوازې دا چي کورني اقتصاد ته وده ورکوي، بلکي د زرګونو هيوادوالو په ځانګړي ډول ښځینه وو ته په ښارونو، کلیو او بانډو کې کاري زمینې برابروي.
