افغانستان کې د اسیا پراختیایي بانک د پروژو لومړۍ ربعې ارزونه وشوه
مالیې وزارت او اسیا پراختیایي بانک د افغانستان لپاره د ۱۳۹۹ مالي کال په لومړۍ ربعه کې د دې بانک پروژې و ارزولې.
د دې ارزونې موخه د پروژو د عملکرد ارزونه او له مالي هوکړه لیک سره یې انډول، د پروژو د اغېز په تړاو راپور، د افغانستان حکومت او اسیا پراختیایي بانک له ستراتېژۍ سره سم د پروژو له پایلو څارنه، د دې ارزونې مخکنيو اقداماتو بررسي، د پروژو په پلي کولو د اغېزمنو سیتماتیکو ستونزو پېژندنه او حل لارې او د مرستو او پروژو د مؤثریت په تړاو د ستراتېژیکو ستونزو پېژندل دي.
د اسیا پراختیایي بانک دمګړۍ د ټرانسپورټ، انرژۍ، کرنې او طبیعي سرچینو په سکټورونو کې ۲۶ سترې پروژې چې ټولیز لګښت یې ۳،۲ میلیارده ډالر کېږي او یادې پروژې د کرنې اوبو لګونې او مالدارۍ او ټرانسپورټ وزارتونو، د اوبو د چارو تنظیم ملي ادارې او د افغانستان برېښنا شرکت له لوري پلي کېږي.
دغه ارزونه د کب میاشتې له ۱۵ تر ۲۶ مې د وزارتونو او پلي کېدونکو ادارو له لوري د متعددو تخینکی ناستو په پایله کې د مالیې وزارت او اسیا پراختیایي بانک تخنیکي ډلو په مرسته ترسره شوه، چې په پایله کې یې د پروژو د ښه والي لپاره اړینې پرېکړې وشوې او مالیې وزارت به د یادو پرېکړو په پلي کولو کې له اړوندو ادارو او وزارتونو سره همغږي وکړي.
