تېره اوونۍ د هيواد په بېلابېلو ولایتونو کي په زیاته اندازه قاچاقي توکي نیول سوي دي!
د غویي ۹مه ۱۴۰۴هـ.ل
د مالیې وزارت د ګمرکونو لوی ریاست د ګرځنده څارني کارکوونکو تېره اوونۍ د نیمروز، کندهار، فراه، هرات او هلمند ولایتونو په بېلابېلو سیمو کي په زیاته اندازه قاچاقي توکي نیولي دي، چي قاچاق کوونکو غوښتل په پټه ئې افغانستان ته راوړي.
په نیول سویو توکو کي (۲۲۵۶۰) کیلو ګرامه انساني او زراعتي درمل، (۵۲۶۵)کیلوگرامه مالګه، (۱۹۲۰) کیلو ګرامه چاکلېټ، (۱۱۱۰) کیلو ګرامه رُب، (۲۰۵۶) کیلو ګرامه پنیر، (۹۰۰) کیلو ګرامه د لیمو اوبه، (۲۲۰) کیلو ګرامه وچي شیدې او (۶۱۶) کیلو ګرامه مکروني شامل دي.
نیول سوي توکي او تورن کسان د نورو اجراآتو له پاره اړوندو ګمرکونو ته سپارل سوي دي.
د یادوني وړ ده، چي د مالیې وزارت د ګرځنده څارني کارکوونکي په ټول هیواد کي ګرځنده څارني کوي او هیچا ته اجازه نه ورکوي، چي ممنوعه او قاچاقي توکي ولېږدوي.
