تېره اوونۍ د هیواد په بېلابېلو ولایتونو کي په زیاته کچه قاچاقي توکي نیول سوي دي!
د مالیې وزارت د ګمرکونو لوی ریاست د ګرځنده څارني کارکوونکو تېره اوونۍ د نیمروز، کندهار، فراه، ننګرهار او هلمند ولایتونو په بېلابېلو سیمو کي په زیاته کچه قاچاقي توکي نیولي دي، چي قاچاق کوونکو غوښتل په پټه ئې افغانستان ته راوړي.
په نیول سویو توکو کي (۱۴۹۲۷) کیلو ګرامه ګوړه، (۶۹۷۹) کیلو ګرامه چاکلېټ، (۵۴۵۰) کیلو ګرامه مالګه، (۲۰۷۹) کیلو ګرامه درمل، (۱۲۰۰) کیلو ګرامه کینو، (۱۴۸۸) کیلو ګرامه خام نخود، (۳۰۶) کیلو ګرامه د خیاطۍ د ماشین تېل او (۲۶۵) کیلو ګرامه پاکټي شیدې شاملي دي.
نیول سوي توکي او تورن کسان د نورو اجراآتو له پاره اړوندو ګمرکونو ته سپارل سوي دي.
همدا شان د هرات ګمرک کارکوونکو په دوو جلا محمولو کي (۱۶۱،۵) کیلو ګرامه زعفران، چي په ډېر مهارت سره ځای پر ځای سوي ول او د ابو نصر فراهي ګمرک کارکوونکو (۸) پایې لویي او (۸) پایې وړې مخابرې نیولي دي، چي قاچاق کوونکو غوښتل په پټه ئې له ایران هیواد څخه افغانستان ته راوړي.
