د افغانستان د بیا رغونې صندوق د مشرتابه پلاوي د کمیټې کلنۍ غونډه ترسره شوه
د ۱۳۹۹ د وږي ۱۲ نېټه ـــ د افغانستان بیا رغونې صندوق د مشرتابه کمیټې د افغانستان دولت د ملي بودیجې تر ټولو لویې نړیوالې تمویلوونکې سرچینې په توګه چې نړیوال بانک یې مدیریت کوي، نن خپله کلنۍ غونډه ترسره کړه. دا غونډه د مالیې وزارت نوماند وزیر او سرپرست ښاغلي عبدالهادي ارغندیوال او د افغانستان لپاره د نړیوال بانک ريیس ښاغلي هینري کرالي په ګډه مشرۍ د ویډیو کنفرانس له لارې ترسره شوه.
په دې غونډه کې د مرستندویو هېوادونو سفیرانو او د نړیوالو تمویلوونکو ادارو استازو د افغانستان دولت د پراختیايي پروګرامونو د ملاتړ د دوام لپاره د افغانستان د بیارغونې صندوق د رول په اړه بحث او د نظرونه تبادله وکړه. د دې کمیټې د رهبرۍ غړو پر دې سربېره چې په ۱۳۹۷ -۱۳۹۹ کلونو کې د افغانستان د بیارغونې صندوق د مالي ستراتیژۍ د پرمختګ بهیر یې وڅېړه، پر دې باندې یې هم بحث وکړ چې تر ۱۳۹۹ کال وروسته زماني مودې لپاره د دې صندوق د مالي همکاریو پروګرام د چوکاټ له لارې مالي مرستې څنګه برابرې کړي. د افغانستان حکومت د افغانستان د بیارغونې صندوق په مرسته له نړیوالو همکارانو سره په نږدې همغږۍ او مشارکت سره تل هڅه کوي چې د بېوزلۍ کچې د راکمولو، د اساسي خدمتونو وړاندې کولو، د عامه او ملکي پروګرامونو لپاره د عادي بودیجې د تأمینولو او د اساسي اصلاحاتو د عملي کولو لپاره لازمې چارې طرحه او عملي کړي.
د مالیې وزارت سرپرست ښاغلي عبدالهادي ارغندیوال، د غونډې ګډونوالو ته په خطاب کې وویل: " موږ د افغانستان د بیارغونې صندوق او د نړیوالو تمویلوونکو هېوادونو د هغو مالي او تخینکي مرستو په خاطر مننه کوو چې د کوویډـ۱۹ ناروغۍ له خپرېدو سره د مقابلې لپاره یې د افغانستان دولت د اړتیاوو پوره کولو لپاره کړې وې. موږ په تېره بیا، ستاسو د سخاوت، هلو ځلو او ژمنې په خاطرچې په دې بیړني او سخت حالت کې مو د افغانستان خلکو د ملاتړ لپاره ترسره کړي دي، د زړه له کومي مننه کوو. د کوویډ-۱۹ له بحران سره د مقابلې په برخه کې ستاسو بې دریغه مرستې او ملاتړ سبب شول چې افغانستان د دې ناروغۍ د لا زیاتې خپرېدا د مخنیوي او د دې نړیوال روغتیایې بحران د مقابلې لپاره لا وچت ګامونه پورته کړي. موږ د نړیوال بانک ګروپ څخه هم مننه کوو چې د افغان ټولنې او کورنیو سره د مرستې پروژې، د کوویډ-۱۹ ناروغۍ سره د بیړنۍ مقابلې د چمتووالي او د افغانستان روغتیایې نظام د پیاوړي کولو پروژې، د کرنې او د غذايي خوندیتوب د بېړنۍ پروژې د تمویل لپاره یې مالي ملاتړ برابر کړی دی. "
د افغانستان لپاره د نړیوال بانک رییس ښاغلي هینري کرالي وویل:" په داسې حال کې چې افغانستان د کوویډ-۱۹ په پانډیمۍ پسې له خورا سختو سیاسي او اقتصادي شرایطو سره مخ دی، د افغانستان د بیارغونې صندوق د وړیا مالي مرستو د برابرولو له لارې هڅه کړې ده چې د خدمتونو وړاندې کولو بهیر د دوام او د پراختیايي موخو د غځولو په برخه کې د افغانستان له دولت سره مستمره همکاري او ملاتړ وکړي. د افغانستان د بیارغاونې صندوق د افغانستان دولت د عادي او پراختیایې بودیجې تر ټولو لویه تمویلوونکې سرچینه ده چې نړیوال بانک یې مدیریت کوي. نړیوال بانک له خپلو نړیوالو شریکانو سره کار کوي چې په راتلونکې کې د افغانستان دولت او خلکو د دوامداره ملاتړ په اړه ډاډ حاصل شي.
یادې کمیټې له ۲۰۲۰ کال وروسته د افغانستان د بیارغونې صندوق لومړیتوبونه، د دې صندوق د مالي همکاریو پروګرام له چوکاټ سره سم، و ارزول او بحث یې ورباندې وکړ او د مالي همکاریو په پروګرام کې یې کلني بدلونونه منظور کړل. د کمیټې غړو د افغانستان د بیارغونې صندوق د ملاتړ او همکارۍ د دوام او د هغو پروژو د مؤثریت زیاتولو په اړه چې دا صندوق یې تمویلوي، ژمنې وکړې.
******
د افغانستان د بیارغونې صندوق په اړه:
د افغانستان د بیارغونې صندوق د افغانستان لپاره د مالي مرستو تر ټولو مهمه او معتبره سرچینه ده چې نړیوال بانک یې د ۳۴ نړیوالو تمویلوونکو او د نړیوالو سازمانونو په استازیتوب مدیریت کوي. دا صندوق د پراختیايي پروګرامونو د مخ ته وړلو او د اصلاحاتي لومړیتوبونو د تطبیق لپاره مالي مرستې نېغ په نېغه د افغانستان ملي بودیجې ته برابروي او د افغانستان دولت تر ټولو لوی تمویلوونکی ګڼل کېږي.
