د انرژۍ او کانونو په سکټورونو کې د چین هیواد پانګونه د مالیې وزارت سرپرست او په افغانستان کې د چین ولسي جمهوریت سفیر د خبرو اصلي محور
د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي ډاکټر محمد همایون قیومي، نن د کب میاشتې په ۱۲ مه نېټه د افغانستان لپاره د چین ولسي جمهوریت له سفیر ښاغلي لیوجین سونګ سره وکتل.
په دې کتنه کې دواړو لوریو د افغانستان او چین تر منځ د اقتصادي او سوداګریزو اړیکو په لا ټینګښت او پراختیا، د چین هیواد له لوري په بامیانو ولایت کې د ۱۰۰ میګاواټه په ظرفیت سره د سولري پارک په جوړیدو، د کانونو په سکټور کې د یاد هیواد په پانګونې، د افغانستان او شمال او لویدیز ولایتونو کې د بادي برېښنا د تولید استیشن په برخه کې د چین هیواد په پانګونې، د اریانا افغان هوایې شرکت له لخوا د دواړو هیوادونو تر منځ د هوایې دهلیز له لارې د سوداګریزو اموالو په لیږد، په هیواد کې د طبیعي پیښو څخه د مخنیوي په موخه د هشدار سیستم په جوړیدو او د واخان ځمکني دهلیز پروژې په پلي کیدو کې د چین هیواد په همکارۍ، د افغانستان د ګمرکونو د سکنرونو په ترمیم او یو شمېر نورو مسایلو بحث او د نظرونو تبادله وکړه.
