د انرژۍ پروژو پلي کول او سیمه ایزې همکارۍ د مالیې وزارت سرپرست او د ترکمنستان سفیر د خبرو اصلي محور وو
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي ډاکټر محمد همایون قیومي، نن د کب میاشتې په ۲۲ مه نېټه د افغانستان لپاره د ترکمنستان له سفیر ښاغلي هوجا اوویزوف، سره وکتل.
په دې کتنه کې دواړو لوریو د ۲۰۱۹ کال فبرورۍ میاشتې په ۲۱ مه نېټه ترکمنستان ته د جلالتماب ولسمشر د سفر د سندونو په عملي کېدو، په نږدې راتلونکې کې د تورغونډۍ – هرات ۲۲۰ ولټه برېښنا پروژې په عملي کار، د خم اب – قرقین برېښنا مزي په لېږد، هند او پاکستان ته د افغانستان له لارې د ترکمنستان د ګازو نل لیکې یا ټاپي پروژې په لېږد، د ترکمنستان د ترانسپورت وزارت له لوري د اقینې – اندخوی او تورغونډۍ – هرات د رېل پټلۍ لومړنۍ کرښې د کار په پیلېدو او یو په شمېر نورو اړوندو مسائلو خبرې وکړې.