د اړینو لګښتونو او معاشونو د اجراء په موخه د مالیې وزارت کارکوونکي د جمعې په ورځ دندو ته حاضر سول!
د حمل/ ۱ / ۱۴۰۴ هـ.ل
د مالیې وزارت له لوري د امارتي ادارو د (۱۴۰۳هـ.ل) مالي کال د وروستیو اړینو لګښتونو او د کارکوونکو د معاشونو د اجراء په موخه، د مرکزي او ولایتي تادیاتي څانګو کارکوونکي د نوي (۱۴۰۴) مالي کال د حمل میاشتي په لومړۍ نېټه (جمعې په ورځ) خپلو دندو ته رابلل سوي دي.
په دې توګه امارتي ادارې کولای سي، چي د خپلو اړینو لګښتونو او د معاشونو حوالې د مالیې وزارت تادیاتي څانګو (په مرکز کي د تادیاتو ریاست او په ولایتونو کي مستوفیتونو) ته د اجراء په موخه تسلیم کړي.
همدا راز د ګڼي ګوڼي او وخت د ضایعه کېدو څخه د مخنیوي په موخه د ادارو له درنو مسؤلینو څخه په ډېر درنښت غوښتنه کېږي، چي مالیې وزارت ته د خپلو سپارل سويو حوالو معلومات په اړوندو ادارو کي د سیسټم له لاري وڅاري.
د مالیې وزارت ډاډ ورکوي، چي د ټولو امارتي ادارو د اړینو لګښتونو او معاشونو سپارل سوي حوالې له کوم ځنډ پرته پر ټاکلي وخت د اجراء په حال کي دي.
