"د جینوا – ۲۰۲۰ کنفرانس د ژمنو د تعقيب او ترسره کولو" لوړ پوړی ورکشاپ جوړ شو
د ماليې وزارت سرپرست ښاغلي محمد خالد پاینده، د کب پر ۲مه نیټه "د جینوا – ۲۰۲۰ کنفرانس د ژمنو د تعقیب او ترسره کولو" په موخه د افغانستان د جلالتماب ولسمشر محمد اشراف غني تر مشرۍ لاندې رابلل شوي لوړ رتبه ورکشاپ د پرانستې په غونډه کې وينا وکړه. دا مراسم چې د ارګ په چهار چینار مانۍ کې جوړ شوي وو د جمهوري ریاست دواړو مرستیالانو، د کابينې غړو، د ماليې وزارت پالیسۍ معین، سفیرانو او په کابل کې میشتو کوردپلماتیکو غړو هم په کې ګډون کړی وو.
د ماليې وزارت سرپرست وزیر وويل چې د افغانستان د اسلامي جمهوري دولت او د نړيوالو همکارانو تر منځ مشارکت زموږ په ګډو ارزښتونو او موخو کې ريښې لري. د ماليې وزارت سرپرست وزیر د چارو ادارې ته د افغانستان د مشارکت چوکاټ (APF) د تطبيق د داخلي او بين الوزارتي همغږۍ د مسئوليت د لیږد هرکلی وکړ.
او د حکومت د هغې پریکړې پر وړاندې يې چمتو والی وښود چې د ماليې وزارت به د افغانستان د مشارکت چوکاټ (APF) د تطبيق لپاره له مرسته ورکوونکو سره همغږۍ او د مرستو د همغږۍ د نورو مواردو بهیر ته د پخوا په څیر دوام ورکړي چې د افغانستان د سولې او پراختیا ملي چوکاټ دویم سند د پلي کولو مديریت به هم د ماليې وزارت تر مشرۍ لاندې دوام پیدا کړي.
