د روان کال د غویي میاشت کي په ګمرکونو کي د تر سره سوو چارو تخنیکي ارزونه وسوه
د روان کال د غویي په میاشت کي په ګمرکونو کي د تر سره سوو چارو د تخنیکي ارزوني ناسته د ګمرکونو او عوایدو معین (ملا عبد القاهر ادریس) په مشرۍ د یاد معینیت د غونډو په تالار کي د ویډیو کنفرانس له لاري جوړه سوه.
په دې ناسته کي د ګمرکونو لوی رئیس مفتي عبدالمتین سعید، د ګمرکونو لوی ریاست مرستیالانو او رئیسانو، د ګمرکونو د ساتني او ځانګړو عملیاتو تنفیذي قطعې قوماندان او د ولایتي ګمرکونو مسؤلینو ګډون کړی وو.
په پیل کي د ګمرکونو او عوایدو معین ټولو ګډونوالو ته ښه راغلاست وویل او د ولایتي ګمرکونو مسؤلینو ته ئې سپارښتنه ورکړه، چي د مثبتو پایلو تر لاسه کولو لپاره باید خپلو اړوندو مسؤلیتونو په جدي ډول پاملرنه وکړي او کوم هدایات چي د مرکز له لوري ورکول کېږي په غور سره ئې واوري او پلي ئې کړي.
له اجنډا سره سم د ګمرکونو لوی ریاست د پلان جوړوني، پالیسۍ، څارني او ارزوني رئیس (محمد وسیم عثمان) له لوري د روان مالي کال د غویي په میاشت کي په ګمرکونو کي د تر سره سوو فعالیتونو په تړاو ټولیز راپور وړاندي سو او همدا راز په دې موده کي د عوایدو راټولېدو، د هیواد په ټولو ګمرکونو کي تر سره سوې سوداګري، د وارداتي توکو ګمرکي ارزښت او د سوداګریزو محمولو د شمېر او ثبت سوي وزن په اړه ئې غونډې ته بشپړ معلومات وړاندي کړل.
د غونډي ګډونوالو د یاد راپور په اړه هر اړخیز بحث وکړ او د چارو د لا ښه والي لپاره ئې د ولایتي ګمرکونو مسؤلینو ته لازمي سلا مشورې ورکړې.
د ولایتي ګمرکونو مسؤلینو هم په خپل وار سره په خپلو اړوندو کاري برخو کي د شته ستونزو یادونه وکړه، چي د ګمرکونو لوی ریاست د رهبري له لوري د ژر حل کېدو ډاډ ورکړل سو.
د ګمرکونو د ساتني او ځانګړو عملیاتو تنفیذي قطعې قوماندان هم په امنیتي برخه کي د چارو د لا ښه والي په موخه د ولایتي ګمرکونو مسؤلینو ته لازمي سلا مشورې ورکړې.
په پای کي د ګمرکونو لوی رئیس په تضمین سره د سوداګریزو توکو د ترخیص، اسلامي اصولو په رڼا کي د کارکونکو د سیرت او صورت د جوړېدو، په خپل وخت سره د ترخیص سوو توکو د ګمرکي سندونو د نظارت او بررسۍ، د هغو اشخاصو پېژندنه چي په خپلو جوازونو کمېشنکاري کوي او یو شمېر نورو موضوعاتو په اړه د ولایتي ګمرکونو مسؤلینو ته اړیني سپارښتني وکړې.
