د سپین بولدک په ګمرک کي د راستنېدونکو کډوالو له پاره ځانګړي لاره پرانیستل سوي ده!
د وري ۲۶مه ۱۴۰۴هـ.ل
د مالیې وزارت د ګمرکونو لوی ریاست د رهبرۍ د هدایت پربنسټ د کندهار ګمرک رئیس الحاج مولوي سفر محمد سحر د کندهار ولایت سپین بولدک ګمرک ته سفر وکړ او هلته ئې د راستنېدونکو کډوالو د راستنېدني بهیر له نږدې څارلی.
د سپین بولدک په ګمرک کي له پاکستان څخه د جبري را ایستل سویو هیوادولو له پاره ګڼي اسانتیاوي برابري سوې دي. پخوا به راستنېدونکي کډوال مکلف وو، چي د راتګ پر مهال ګمرکي پارچه واخلي، چي د پارچې اخیستل د دوی د سر ګردانۍ سبب ګرځېدل. اوس مهال د مسئولینو په هدایت د یادي پارچې اخیستل لغوه سوي او تر څنګ ئې د راستنېدونکو کډوالو له پاره په دغه ګمرک کي ځانګړي لاره پرانیستل سوي ده؛ څو کډوالو ته د هوسا راستنېدني زمینه برابره سي.
د یادولو وړ ده، چي وړمه ورځ د ګمرکونو لوی رئیس هم تورخم ګمرک ته سفر وکړ او هلته ئې د راستنېدونکو کډوالو د راستنېدني بهیر له نږدې وڅارل او د لا اسانتیا رامنځته کولو په موخه ئې اړوندو مسئولینو ته لازمي سپارښتني وکړې.
