د سیمه ایز اقتصاد د همکاریو اتصال او پراختیا عالي شورای تخنیکي ناسته وشوه
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، په مشرۍ د ټرانسپورټ، صنعت او سوداګرۍ، مخابراتو او معلوماتي ټکنالوژۍ وزارتونو د مسؤلینو په ګډون د سیمه ایز اقتصاد د همکاریو اتصال او پراختیا عالي شورای تخنیکي ناسته د مالیې وزارت په خیبر هال کې وشوه.
په دې ناسته کې په سیمه ایز اتصال، د ترانسپورتي زېربناوو په پراختیا، په ترانزیټي او سوداګریزو اسانتیاوو، د لاجوردو لارې او چابهار بندر په ستونزو او خنډونو، د منځنۍ اسیا له هیوادونو سره د درې اړخیزه ټرانزیټ په هوکړه لیک، له پاکستان سره د ټرانزیټي ستونزو په پېژندو او د تیر له کنوانسیون څخه په ګټه اخیستنه د حل لارو په وړاندي کولو، د نوري فایبر په سیمه ایزه نښلونه، د نوري فایبر د پراختیا په پلانونو او د خبرو او انټرنیټ قیمتونو په کمولو بحث او د نظرونو تبادله وشوه.
د شورای ناستې د صنعت او سوداګرۍ وزارت ته دنده وسپارله، څو له ملي سوداګرو سره ناسته وکړي او په اوږدو کې یې له بېلابېلو هیوادونو سره د سوداګرۍ پراختیا امکانات وڅېړي او راتلونکې ناستې ته یې پایلې وړاندي کړي. همدا راز د ټرانسپورټ وزارت ته دنده وسپارل شوه، چې له ټرانسپورټي شرکتونو سره د ورکشاپونو له لارې د ټرانزیټي محمولو لېږدولو په اړه عامه پوهاوی ورکړي.
د یادونې وړ ده، چې د سیمه ایز اقتصاد د همکاریو اتصال او پراختیا عالي شورای غړي د بهرنیو چارو، ټولګټو، اقتصاد، ټرانسپورټ او هوایي چلند، مخابراتو او معلوماتي ټکنالوژۍ او مالیې وزیران او د ملکي هوایي چلند او اوسپنې کرښې ملي ادارې مسؤلین دي.
