د عوايدو لوی رئيس د هيواد د صرافانو ټولني له غړو سره غونډه وکړل
د ماليې وزارت د گمرکونو او عوايدو معينيت اړوند د عوايدو لوی رئيس معراج محمد معراج د هيواد د صرافانو ټولني له مرستيال دادگل او غړو سره د گمرکونو او عوايدو معينيت د غونډو په تالار کي غونډه وکړل او د صرافيو د اړوندو مالياتو په اړه يې هراړخيزي خبري او بحث ترسره کړ.
په دې غونډه کي د عوايدو لوی رئيس معراج محمد معراج په خپلو خبرو کي وويل: "موږ ژمن يو او په همدې ډول له صرافانو څخه هم غوښتونکي يو چي د دوه اړخيزي همکارۍ په چاپېريال کي فساد صفر ته راټيټ کړو، د بېلابېلو اصنافو له پاره اسانتياوي رامنځته کړو، ماليات په عدل سره تر لاسه کړو او د درواغو او غلاؤ فرهنگ په له منځه وړلو کي تلپاتي همکاران واوسو."
د خبرو او بحث پر مهال د صرافانو ټولني مرستيال دادگل او ورسره غړو د مالياتو په برخه کي د صرافانو ستونزي او وړانديزونه بيان کړل چي د عوايدو لوی رئيس له لوري ورته د حل لاري په گوته سوې.
د غونډي په پای کي څو گډي هوکړي پر دې وسوې چي صرافان به د ثابتي ماليې پر ځای د مالياتي اظهارليک په وړاندي کولو سره خپله ماليه تاديه کوي او همدا راز له صرافانو څخه د مالياتو د ټاکلو او اخيستلو له پاره به په گډه د عوايدو لوی رياست او د صرافانو ټولني د استازو يوه کمېټه جوړيږي او د هغوئ د گډي هوکړي په پايله کي به د صرافۍ ماليات د يوه مشخص ميکانيزم له لاري وضع او راټوليږي.
