د عوایدو او ګمرکونو معینیت د اړوندو ریاستونو ترمنځ د همغږۍ دوولسمه ناسته وشوه
د غبرګولي ۱۶مه۱۴۰۵هـ.ل
د مالیې وزارت د ګمرکونو او عوایدو معین الحاج مفتي عبدالمتین سعید په مشرۍ د دغه معینیت د اړوندو ریاستونو د رئیسانو او مسئولینو په ګډون د همغږۍ دوولسمه ناسته وشوه.
په پیل کې د ګمرکونو او عوایدو معین د هغمږۍ ناستو د پرېکړو په پلي کېدو، د چارو د لا ښه والي په موخه د کارکوونکو ترمنځ د کاري تجربو په شریکولو، د مشرتابه عالي مقام له توصیو سره سم د کارکوونکو د سیرت او صورت په جوړولو او یو شمېر نورو موضوعاتو په اړه مسئولینو ته لازمې سپارښتنې وکړې.
ورپسې د تېرې ناستې پر مهال ټاکل شویو پلاوو ته د سپارل شویو مسئولیتونو د اجراآتو راپورونه واورول شول او په اړه یې لازم هدایات هم ورکړل شول. همدا شان پرېکړه وشوه، چې د مراجعینو ستونزو ته د رسېدو په موخه د ګمرکونو او عوایدو معینیت د اړوندو ټولو مرکزي او ولایتي ریاستونو د مسئولینو رسمي شمېرې او ایمېل ادرسونه دي د ټولنیزو رسنیو له لاري نشر شي؛ څو هیوادوال وکولی شي خپلې ستونزې په مستقیم ډول له اړوندو مسئولینو سره شریکې کړي.
د یادونې وړ ده، چې د ګمرکونو او عوایدو معینیت د همغږۍ دغه ډول ناستې هره میاشت د اړوندو ریاستونو ترمنځ د کاري اړیکو د پراخولو او د موجوده ستونزو د حل په موخه ترسره کېږي.
