د عوایدو لوی ریاست نوی عملیاتي مرستیال معرفی سو!
د مالیې وزارت رهبرۍ د لزوم دید او په چارو کي د نویو پرمختګونو په موخه د ګمرکونو او عوایدو معین الحاج ملا عبدالقاهر (حاجی ادریس) له لوري حافظ محمد ابراهیم د عوایدو لوی ریاست د عملیاتي مرستیال په توګه د دغه ریاست کارکوونکو ته ور وپېژندل سو.
د پېژندني په دغو مراسمو کي د عوایدو لوی ریاست رئیس حافظ شاه حسین حسیني، د ګمرکونو لوی رئیس مولوي عبدالمتین سعید او د دغه ریاست رئيسانو او کار کوونکو هم حضور درلود. ښاغلی حافظ محمد ابراهیم تر دې وړاندي د ګمرکونو لوی ریاست کي د ګمرکونو د قانون پلي کولو او اطاعت پذیرۍ ریاست چاري مخته وړلې.
ښاغلي حاجي ادریس د پېژند غونډي پر مهال وویل، چي دغه نظام د مال او پیسو په سرمایه ګذارۍ نه دئ راغلی؛ بلکي دغه نظام د وینو په سرمایه ګذارۍ راغلی دئ؛ نو موږ او تاسو ته پکار ده، چي له پوره احتیاط څخه کار واخلو تر څو په ورځ د آخرت خپلو شهیدانو ته ملامت ونه اوسو. نوموړي همدارنګه د عوایدو لوی ریاست له ټولو رئیسانو وغوښتل، چي له نوي عملیاتي مرستیال سره په کارونو کي پوره همکاري وکړي او د مراجعینو کارونه باید پر خپل وخت خلاص او ښه چلند ورسره وسي.
د یادوني وړه ده، چي د عوایدو لوی ریاست مخکنی عملیاتي مرستیال حافظ خلیل احمد د ننګرهار ولایت د نوي مستوفي په توګه معرفي سو.
