د فساد، بې غورۍ او کم کارۍ ستونزو ته د رسېدو په موخه له خلکو سره د مالیې وزارت د سرپرست مخامخ ناسته
د مالیې وزارت سرپرست محمد خالد پاینده، د فساد، بې غورۍ، کم کارۍ او د مالیې وزارت د ځینو کارکوونکو او مسؤلینو د ناوړه چلند او نورو ورته ستونزو ته د رسېدو په موخه د خلکو له مختلفو قشرونو (ملي سوداګرو، پانګوالو او عامو خلکو) سره د دې وزارت په خیبر هال کې په مستقیم ډول وکتل.
په دې لیدنه کې چې د مالیې وزارت د پالیسۍ مرستیال نذیر کبیري، د مالیې وزارت مقام د دفتر عمومي رئیس عبدالخالق سرابي او د دې وزارت مسؤلینو او یو شمېر کارکوونکو هم ګډون کړی وو، په پیل کې د مالیې وزارت مقام د دفتر ریاست په تشکیل کې شکایتونو ته د رسېدو اورېدو امریت رامنځته کېدو، د (ترسره شویو او تر کار لاندې) شکایتونو د وضعیت، د شکایتونو مجموعې، (مؤجه شکایتونو، غیر مؤجه شکایتونو او حل شویو شکایتون) او د شکایتونو ترلاسه کولو په تړاو پریزینټېشن وړاندې شو.
ورپسې بېلابېلو قشرونو، د مالیې وزارت د بېلابېلو برخو په ځانګړي توګه عوایدي سرچینو، استخدام په برخه کې د اصلاحات، او دولتي شرکتونو په برخو کې خپلې ستونزې، وړاندېزونه او نظرونه د مالیې وزارت له سرپرست شریک کړل او دغو موضوعاتو ته د رسېدو غوښتونکي شول. د مالیې وزارت سرپرست، د دوی د ستونزو اورېدو ترڅنګ، ستونزې ډل بندي کړې او دغو ستونزو ته د رسېدو په موخه یې اړوندو مراجعو ته وړاندې کړې. نوموړي ټولو شکایت کوونکو ته ژمنه ورکړه، چې د هیواد نافذه قوانینو او امکاناتو په پام کې نیولو سره به یې ستونزو ته رسېدنه کېږي.
د یادونې وړ ده، چې د مالیې وزارت سرپرست، د حکومت په کچه د یوه بېساري اقدام په ترسره کولو، د پنجشنبې په ورځو له (۱-۳ بجو پورې) د مختلفو قشرونو (مالیه ورکوونکو، ملي سوداګرو، د خصوصي سکټور استازو او عامو خلکو) سره له نږدې لیدنه او خبرې کوي، څو د دوی ستونزې له نږدې واوري او د نافذه قوانینو په رڼا کې د حل لارې ورته ومومي.
