د فساد د مخنيوي په تړاو د ماليې وزارت عوايدو لوی رياست خبرتيا!

ماليات د هيواد د ملي شتمنۍ (بيت المال) ستره برخه، او په هیواد کي د نظام د پايښت، ټينگښت او لگښتونو د ملاتړ سرچينه ده. له همدې کبله د مالیاتي چارو شفافیت، کنټرول، معیاري کول او ارزول نه یوازي د مالیې وزارت؛ بلکي د ټولو افغانانو ديني، انساني او ملي دنده ده، چي په دغه مسؤليت کي پراخه او مسؤلانه ونډه واخلي.
گرانو هيوادوالو! هغه ماليه ورکوونکي، چي د مالياتي قوانينو له مخي په سم او راڼه ډول خپل مالياتي مکلفيتونه نه ترسره کوي او کوښښ کوي، چي د مالياتو له ورکړي تېښته وکړي او يا هم د مالياتي ادارو هغه کارکوونکي چي د اداري او مالي فساد، د قانون څخه د سرغړونو او ناقانوني کړنو لامل کېږي؛ هیله ده، چي د ذکر سوو چارو د سمون، ټينگښت او پايښت په موخه او د انساني، ديني او ملي رسالت او مسؤليت له مخي د دغو ناکاره وگړو او د هغوی د ناقانوني کړنو په اړه د ماليې وزارت د عوايدو لوی رياست د اړیکو نیولو د خدمتونو له مرکز (۱۰۰۰) شمېرې او يا هم له (info.ard@mof.gov.af) رسمي برېښناليک سره د اړيکو په ټينگولو، زموږ سره خپل معلومات شريک کړئ.
که چيري تاسي د ماليې وزارت د عوايدو لوی رياست سره د هر ډول مالياتي مواردو د تخلف په اړه معلومات شريک کړئ، ستاسي هويت به په بشپړ ډول خوندي وي.
د ماليې وزارت د عوايدو لوی رياست رهبري د مالياتي ادارو د سمون او اصلاح په موخه ټينگ هوډ لري، چي اداري فساد له منځه یوسي او د عوایدو را ټولو سیسټم شفاف او معیاري کړي.
زموږ ماليه، زموږ هيواد، زموږ راتلونکی