د لوړ پوړي پلاوي څلورمې ناستې دویمه حاشیوي غونډه د افغانستان د سولې او پراختیا ملي چوکاټ په اړه جوړه شوه
د لوړ پوړي پلاوي څلورمې ناستې دویمه حاشیوي غونډه نن د زمري میاشتې په ۶ مه نېټه د افغانستان د ملي امنیت سلاکار ښاغلي حمدالله محب او د افغانستان لپاره د ملګرو ملتونو سازمان ځانګړې استازې اغلی ډیبوره لیونز په ګډه مشرۍ د افغانستان د سولې او پراختیا ملي چوکاټ په اړه په ولسمشرۍ ماڼۍ کې جوړه شوه.
په دې غونډه کې د سولې په چارو کې د دولت وزارت ستر سلاکار ښاغلي شعیب رحیم، د افغانستان د سولې په چارو د امریکا متحده ایالتونو د ځانګړي استازي مرستیالې اغلی مولي في او د مدني ټولنې استازې اغلی حمیرا ثاقب له اصلي ویناوالو څخه و.
په پیل کې د هیواد د ملي امنیت سلاکار د سولې تامینول د ودې لپاره اساسي شرط یاد کړ او زیاته یې کړه چې د افغانستان حکومت پایدارې سولې ته د رسیدو لپاره جدي اقدامات او اساسي پروګرامونه تر لاس لاندې نیولي دي او په دې برخه یې زیاتې هڅې کړي دي او له ځان څخه یې حسن نیت ښودلی دی. نوموړي زیاته کړه چې له سولې پرته پرمختګ او له پرمختګ پرته سوله نه شي تامینیدلی او دواړه یو د بل تکمیلونکي دي.
د افغانستان لپاره د ملګرو ملتونو سازمان د سرمنشي استازې وویل چې ملګري ملتونه په افغانستان کې د سولې راتلو ته ژمن دي او موږ د افغانستان له حکومت سره له نږدې کار کو څو په دې هیواد کې سوله تامین شي.نوموړې زیاته کړه چې پراختیا باید داسې وي څو بیوزلۍ او بیکاري له منځه یوسي او افغانستان د ټول شموله او متوازنې اقتصادي ودې درلودونکی وي.
د سولې په چارو کې د دولت وزارت ستر سلاکار وویل چې باید پراختیایې کارونه داسې تنظیم شي څو د اوسنیو جګړو علتونو ته ځواب ویونکې وي او د خلکو لپاره کارموندنه پیدا کړي څو بیوزلۍ له منځه لاړه شي او د هیواد دښمنان ونشي کولی له خلکو څخه د جګړو په لیکو کې ګټه واخلي.
د افغانستان د سولې په چارو کې د امریکا متحده ایالتونو د ځانګړي استازي مرستیالې وویل چې تمویلونکې ټولنه د افغانستان راتلوونکې لپاره ګډ لید لورې لري چې وکولی شي نړیواله ټولنه ځان ته مجنوب کړي. موږ په تېرو دو لسیزو کې د جمهوریت نظام ساتلو، د ښځو، ماشومانو او اقلیتونو د حقونو او جایګاه په برخو کې د افغانستان لاسته راوړنو د ساتلو غوښتونکي یو.
د اسیایې پراختیا بانک رئیس وویل چې د سولې تامین د ټولو افغانانو غوښتنه ده چې موږ پراختیایې پروګرامونه د افغانستان لومړیتوبونو ته په کتو سره تمویلو څو د پایدارې سولې تامینولو په برخه کې مرسته وکړی شو.
په پای کې ټولو ګډونوالو ټینګار وکړ چې افغانان هغه سوله غواړي چې تېرې لاسته راوړنې په کې خوندي شي او زیاته یې چې سوله او پراختیا د یو او بل تکمیلونکي دي او پراختیایې پروګرامونه باید داسې تنظیم شي چې په افغانستان کې د کارموندنې او بیوزلۍ کموالي سبب وګرځي او د افغانستان خلک وکولی شي اساسي خدمتونو ته لاسرسی پیدا کړي.
