د ماليه ورکوونکيو د خدمتونو رياست د ايجاد خبرتيا!
د ماليې وزارت اړوند د عوايدو لوی رياست د ټولو لويو، منځنيو او کوچنيو ماليو تاديه کوونکيو ته په خورا درنښت خبر ورکوي، چې د دغه رياست په تشکيلاتي جوړښت کې د ځينو بدلونونو په راتلو سره د ماليه ورکوونکيو د خدمتونو رياست ايجاد او فعاليت يې پيل کړی او د دغه رياست دنده دا ده چې د لويو، منځنيو او کوچنيو ماليه ورکوونکيو شرکتونو لپاره معياري خدمتونه ترسره کړي.
نو ټول هغه قدرمن ماليه ورکوونکي چې پخوا به د خپلو ماليو د تصفيې لپاره د لويو، منځنيو او کوچنيو ماليه ورکوونکيو رياستونو ته مراجعه کوله، تر دې وروسته د منځنيو ماليه ورکوونکيو رياست پخوانۍ ودانۍ ته چې د ملي بس تصدۍ تر څنگ موقعيت لري او په يوه واحد نامه (د ماليه ورکوونکيو د خدمتونو رياست) سره يادېږي، مراجعه وکړي او خپلې مالياتي چارې دې پر مخ يوسي.
د لا زياتو معلوماتو لپاره د ماليې وزارت او د عوايدو لوی رياست اړوند ویب سایټونه او ټولنیزې پاڼې (فېسبوک، ټويټر او يوټيوب) کتلای شئ.
