د مالیې نوماند وزیر او سرپرست: د کارموندنې په موخه دي ټول دولتي شرکتونه بیا وارزول شي
د مالیې وزارت نوماند وزیر او سرپرست ښاغلي عبدالهادي ارغندیوال، نن د غویي میاشتې په ۴ مه نېټه د دولتي شرکتونو د څار پلاوي له غړي ښاغلي جلال الدین سعید، سره د خپل کار په دفتر کې وکتل.
په دې کتنه کې چې د دولتي شرکتونو رئیس ښاغلي وحیدالله شهراني، هم شتون درلود په پیل کې یې د مالیې وزارت سرپرست، ته د دولتي شرکتونو او څار پلاوي د کړنو او فعالیتونو او د شرکتونو د اوسني وضعیت په تړاو بشپړ راپور وړاندي کړ.
د مالیې وزارت سرپرست وویل، چې د دولت له پلان سره سم دي ټول دولتي شرکتونه له سره مطالعه شي او خلکو ته دي د کار چاره برابره او زیاته شي، په ټولو دولتي شرکتونو کې دي اړین اصلاحات راوستل شي، مدیره پلاوی، پلان او کارونه دي په ښه توګه وارزول شي. د اړتیا په صورت کې دي د شرکتونو د اصلاح لپاره له بهرنیو معتبرو شرکتونو مرسته وغوښتل شي.
د څار پلاوي غړي ښاغلي سعید وویل، چې موږ په دې برخه کې بشپړ کاري پلان او پروګرام تر لاس لاندي لرو او د شرکتونو د اصلاح او سمون په تړاو د پلان راپور به ډېر ژر له تاسو سره شریک کړو.
