د مالیې وزارت او اړوندو ادارو په تائید به نفت او ګاز را واردېږي
د افغانستان اسلامي امارت د ریاست الوزراء د اقتصادي چارو مرستیال ملا عبدالغني برادر په مشرۍ د وزیرانو شورای د اقتصادي کمېسیون ناسته ترسره سوه.
په دې ناسته کي د یو شمېر نورو اقتصادي مسایلو ترڅنګ وویل سول، چي له دې وروسته به ټول نفتي توکي او مایع ګاز د نفتو او ګازو دولتي شرکت تر ریاست لاندي له مالیې صنعت او سوداګرۍ وزارتونو او د نورم او سټنډرډ ادارې څخه جوړي سوي مختلطې کمېټې له تائید څخه وروسته هیواد ته واردېږي.
د افغانستان د نفتو او ګازو دولتي شرکت له خوا په انحصاري توګه د خامو نفتي موادو د تورید اړوند پیشنهادي طرحه تصویب ده. د راتلونکي ۱۴۰۱ کال له حمل میاشتې وروسته، خصوصي شرکتونه د کاندنسات ګازو او خامو نفتي موادو د ورود اجازه نه لري. د صنعت او سوداګرۍ وزارت، د نفتو او ګازو دولتي شرکت او د نورم او سټنډرډ ملي ادارې څخه جوړي مختلطي کمېټې ته دنده سپارل کېږي، څو د یو شفاف میکانیزم له مخي د یادو موادو (تورید څخه پیل، د فابریکې او پالایشګاه له خوا تر مصرف پوري) له پروسې څخه هر اړخیز نظارت ترسره او وقتأ فوقتأ اقتصادي کمېسیون ته راپور وړاندي کړي.
