د مالیې وزارت سرپرست: افغانستان د وچکالۍ او قحطۍ له جدي ګواښ سره مخ دی

د لېندۍ ۶مه ۱۳۹۷: د مالیې وزارت سرپرست او د زېربناوو په چارو کې د ولسمشرۍ عالي مقام ستر سلاکار ښاغلي ډاکټر محمد همایون قیومي، د لېندۍ میاشتې په ۶ مه نېټه د افغانستان لپاره په جینوا کنفرانس کې د ملي یووالي حکومت اجرائیه رئیس ښاغلي ډاکټر عبدالله عبدالله، د ملګرو ملتونو سازمان په جینوا کې د افغانستان سفیرې اغلې ثریا دلیل، د جاپان نړیوالې همکارۍ (JICA) مرستیال ښاغلي جونیشي یامادا، د امریکا نړیوالې پراختیایي ادارې، اداري مرستیالې اغلې کارن فریمن، د نړیوالو خوړو پروګرام (WFP) سکرټر جنرالې اغلې والري ګوارنیرې، په شتون کې د خوړو خوندیتوب، وچکالۍ او قحطۍ په تړاو په حاشیوي ناستو کې ګډون وکړ.

د ملي یووالي حکومت اجرائیه رئیس ښاغلی ډاکټر عبدالله عبدالله، د ناستې اصلي ویاند وو او په سویس د ملګرو ملتونو په سازمان کې د افغانستان سفیره اغلې ثریا دلیل، د ناستې له بهیر څخه څارنه کوله.

په دې ناسته کې د مالیې وزارت سرپرست ګډونوالو ته وویل، چې افغانستان څنګه د وچکالۍ او قحطۍ له ګواښ سره مخ شوی. همدا شان نوموړي، د اوبه ایزو او غیر اوبه ایزو ځمکو د احصائیې، کرنیزو محصولاتو او اوبو په کړکېچ خبرې وکړې. هغه وویل، چې حکومت د دې پروژو په تړاو لنډمهاله پاملرنه ده کړي، بلکه اوږد مهاله او منځمهال ګامونه یې پورته کړي دي. د مالیې وزارت د سرپرست په وینا، حکومت د دې برخې د خطرونو پېښېدو د مخنیوي څرنګوالې لپاره کارونه ترسره کړي دي.

همداشان ښاغلي قیومي، د اوبو مدیریت، کرنې پراختیا، اوبو لګونې پروګرامونو، د سترو او وړو بندونو جوړېدو او د حکومت د انرژۍ پروګرامونه څرګند کړل.