د مالیې وزارت سرپرست د استرالیا هیواد له نوي سفیر سره د پیژندنې په ناسته کې په یو شمېر اقتصادي موضوعاتو خبرې وکړې
د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، نن د وږی میاشتې په ۵ مه نېټه د افغانستان لپاره د استرالیا هیواد له نوي سفیر ښاغلي جیوفري پیټر ټوټ، سره د پیژندنې ناسته وکړه.
په دې ناسته کې د مالیې وزارت سرپرست نوموړي ته د ښه راغلاست تر څنګ د افغانستان لومړیتوبونو سره سم د دې هیواد له مرستو څخه مننه وکړه او له نوي سفیر سره یې په اقتصادي ځان بسیاینې بستې او مالي پانګې اچونې بستې، د افغانستان د ځان بسیاینې ستراتیژۍ په اهدافو، د اصلاحاتو په پلي کیدو، د افغانستان په اقتصادي ودې، د ملي عوایدو په زیاتوالي، د کانونو سکټور په برخه کې د استرالیا هیواد له تجربو څخه په ګټه اخیستنې، یاد هیواد ته د افغانستان ارزښتناکه سوداګریزو توکو په صادرولو، افغان زده کړیالانو ته د تحصیلي بورسیو په ورکړې او یو شمېر نورو اړوندو مسایلو بحث او د نظرونو تبادله وکړه.
د استرالیا سفیر له افغانستان سره د خپل هیواد د مرستو په دوام ټنګار وکړ او ویې ویل چې د غوره شرایطو د تامین په صورت کې استرالیا په افغانستان کې پانګې اچونې ته چمتو ده. نوموړي زیاته کړه چې استرلیا هم له افغانستان څخه د سوداګریزو توکو د واردولو لیوالتیا لري.
د مالیې وزارت سرپرست وویل چې د افغانستان او استرالیا دولتونو د تاریخ په اوږدو کې ښې اړیکې درلودلي او موږ د دوه اړخیزو ګټو په چوکاټ کې د اړیکو د لا پراختیا او تعمیق غوښتونکي یو.
