د مالیې وزارت سرپرست: د اسیایی پراختیا بانک څخه غواړو چې د سېمه ایزې نښلونې په پروژو کې له افغانستان سره مرسته وکړي
د مالیې وزارت سرپرست او د زیربناء په په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د تلې میاشتې په ۲۶ مه نېټه د نړیوال بانک او د پیسو نړیوال صندوق د مدیره پلاوي په کلنۍ غونډو کې د ګډون په موخه د امریکا متحده ایالاتو واشنګټن ډي سي ښار ته په سفر تللی، د یادو غونډو په حاشیه کې یې د اسیایی پراختیا بانک له رئیس ښاغلي تاکهیکو ناکوو سره وکتل.
په دې کتنه کې د مالیې وزارت سرپرست له لومړي سره له اداري فساد سره د جدي مبارزې په اړه د افغانستان حکومت د نوی ستراتیژۍ، د افغانستان اقتصادي او مالي وروستیو پرمختګونو، د پیسو نړیوال صندوق سره د مالي او اقتصادي اصلاحاتو د شپږو پړاونو بریالۍ ارزونې د پای ته رسیدو، د افغانستان اقتصادي ځان بسیاینې استراتیژۍ، سېمه ایزه نښلونه او په دې اړه د افغانستان حکومت د پلانونو، په بریا سره د ولسمشرۍ ټاکنو د تر سره کیدو او یو شمېر نورو مهمو مسایلو په اړه معلومات شریک کړل.
د مالیې وزارت سرپرست د اسیایې بانک له رئیس څخه غوښتنه وکړه چې د سېمه ایزې نښلونې په پروژو کې له افغانستان سره همکاري وکړي. نوموړي زیاته کړه چې موږ د اداري فساد پر وړاندې د مبارزې په امر کې جدي یو او د افغانستان حکومت له فساد سره د مبارزې ستراتیژۍ د ترتیب موخه دا ده چې اداري فساد ریښې له منځه یوسي.
د اسیایې پراختیا بانک رئیس د مالیې وزارت سرپرست ته بلنه ورکړه تر څو په راتلوونکی کال کې د اسیایې پراختیا صندوق (ADF) په ناسته کې ګډون وکړي چې په دې ناسته کې به له افغانستان سره د اسیایې پراختیا بانک په راتلوونکو مرستو خبرې وشي.
