د مالیې وزارت سرپرست د دې وزارت د بودیجې او خزاینو عمومي ریاستونو یو شمېر کارکوونکي وستایل
د مالیې وزارت سرپرست محمد خالد پاینده، د یو لړ مراسمو په ترڅ کې د دې وزارت د بودیجې او خزاینو عمومي ریاستونو یو شمېر کارکوونکي د دوی د ګټورو او اغېزمنو خدمتونو په وړاندي کولو سره وستایل. په دې مراسمو کې چې د مالیې وزارت یو شمېر رئیسانو حضور درلود، مراسم د قران عظیم الشان د مبارکو ایاتونو په تلاوت سره پیل شول.
د بودیجې عمومي ریاست لوی رئیس سید نصیر احمد ، په خپله پرانیستې وینا کې د مالیې وزارت له سر مشرۍ څخه د مننې ترڅنګ د دې پروګرام په تړاو وویل، چې د مکافاتو او مجازاتو اصل پلي کول ښې پایلې لري، چې یو یې هم د غوره کارونو ترسره کولو په سبب د کارکوونکونکو هڅول دي.
د مالیې وزارت سرپرست محمد خالد پاینده، ګډونوالو ته د ښه راغلاست ترڅنګ وویل، چې له کوچني اختر څخه وړاندې دولتي ادارو د معاشونو اجرا کولو په برخه کې ستونزه لرله او د بودیجې او خزاینو عمومي ریاستونو کارکوونکو د روژې په مبارکه میاشت کې د فشار او هلو ځلو په ترسره کولو سره وکولی شول د ۴ ورځو په موده کې د معاشونو ورکړې ستونزه هواره کړي او په حقیقت کې د دوی هلې ځلې د ستایلو وړ دي. د ستاینلیکونو ورکړه په دې معنی ده چې کارکوونکو په خپلو ور سپارل شویو دندو او مسؤلیتونو کې نه ستړي کېدونکي هلې ځلې کړې دي. نوموړي زیاته کړه چې ځیني وختونه د دا ډول ستونزو د له منځه وړلو او کاري پرمختګ لپاره کاري روش بدلولو ته اړتیا وي. د تګلارې په تغییر سره ښه مدیریت، خدمتونو وړاندي کول کولی شي دولت ته د خلکو باور را جلب کړي.
د مراسمو په پای کې د مالیې وزارت سر مشري د بودیجې او خزاینو عمومي ریاست وړ کارکوونکو ته ستاینلیکونه ورکړل.
