د مالیې وزارت سرپرست د سعودي عربستان او کویټ پراختیایی صندوق له چارواکو سره د پانګې جلبولو پلان شریک کړ
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د روانې اوونۍ په پیل کې مراکش هیواد کې د اسلامي پراختیا بانک ۴۴ مې کلنۍ ناستو په څنډه کې د سعودي عربستان او کویټ پراختیایی صندوق له مسؤلینو سره په جلا جلا ناستو کې د حکومت د پانګې جلبولو پلان شریک کړ.
په دې ناستو کې د افغانستان د اقتصادي او مالي ځان بسیاینې په ستراتېژۍ، چې د جینوا په نړیوال کنفرانس کې له نړیوالو همکارانو سره شریکه شوې وه، کرنې او اوبو لګونې، انرژۍ او برېښنا، کانونو، استوګنځایونو په برخو کې د پانګونې پلان په اساس د دې صندوق د پانګې او مرستو په جلبولو او یو شمېر نورو اړوندو مسائلو په تړاو خبرې او د نظرونو تبادله وشوه.
د مالیې وزارت سرپرست په دې ناستو کې ګډونوالو ته د یادو برخو په اړه معلومات ورکړل او زیاته یې کړه چې د افغانستان حکومت یادو استراتیژیکو موخو ته د رسیدو لپاره د پانګونې جلبولو ټولیز پلان چمتوکړې ده.
د سعودي عربستان او کویټ پراختیایی صندوق مسؤلینو ژمنه وکړه، چې د افغانستان حکومت د پانګې جلبولو پلان به په غور سره وګوري او د دې پلان سره سم یې په سترو پروژو کې د پانګونې ډاډ ورکړ.
