د مالیې وزارت سرپرست د پانګونې تضمین څو اړخیزه ادارې او نړیوال مالي سازمان له استازو سره د خصوصي سکټور په برخه کې د ودې او پانګونې په تړاو بحث وکړ
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د نړیوال بانک او پیسو نړیوال صندوق ۲۰۱۹ کال پسرلنۍ ناستو کې د ګډون په مهال د څنډو ناستو په دوام د وري میاشتې په ۲۳ مه نېټه د پانګونې تضمین څو اړخیزه ادارې (MIGA) او نړیوال مالي سازمان (IFC) له استازو سره جلا جلا ولیدل.
په دې جلاجلا لیدنو کې د مالیې وزارت سرپرست له هغوی سره په افغانستان کې د خصوصي سکټور په وده، د کرنې، مسکن او انرژۍ په سکټور کې د خصوصي سکټور د پانګونې په جلب، د پانګونې لپاره د اسانتیاوو په رامنځته کېدو، په دې برخو کې د یادو بنسټونو په تخنیکي همکاریو او نورو وړ اړوندو مسائلو په تړاو بحث او خبرې وکړې.
د مالیې وزارت سرپرست په دې ناستو کې د یادو بنسټونو له مسؤلینو سره د اقتصادي ځان بسیاینې ستراتېژي شریکه کړه او په دې برخه کې یې د همکاریو غوښتنه وکړه.
د یادونې وړده، چې د پانګونې تضمین څو اړخیزه اداره او نړیوال مالي سازمان د نړیوال بانک او پیسو نړیوال صندوق د ګروپ یوه برخه ده، چې موخه یې د سترو پانګونو لپاره د فرصت رامنځته کول، د خصوصي پانګې، پایداره او ځواب ویوونکي خصوصي سکټور د ودې لپاره د نړیوالې پراختیا سازمان (IDA) د غړو هیوادونو مرستې بسیج کول دي.
