د مالیې وزارت سرپرست د پرانیستي حکومتولۍ لپاره د مشارکت نړیوال سازمان له رئیس سره وکتل
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د امریکا متحده ایالتونو واشنګټن ډي سي ته په رسمي سفر، د نړیوال بانک او پیسو نړیوال صندوق ۲۰۱۹ کال پسرلنۍ ناستو کې ګډون وکړ او د وري میاشتې په ۲۳ مه نېټه یې د څنډو په ناسته کې د پرانیستي حکومتولۍ لپاره د مشارکت نړیوال سازمان (OGP) له رئیس ښاغلي سنجي پارډن، سره وکتل.
په دې لیدنه کې دواړو لوریو د افغانستان مالي اصلاحاتو په پرمختګونو په ځانګړي توګه د ملي عوایدو په راټولېدو، د ښې حکومتولۍ په برخه کې د نورو هیوادونو له تجربو څخه په ګټه اخیستنه، د ښې حکومتولۍ په بهیر کې د خلکو په ګډون او یو شمېر نورو اړوندو مسائلو په تړاو خبرې او د نظرونو تبادله وکړه.
افغانستان په ۱۳۹۵ کال کې د ښې حکومتولۍ لپاره د مشارکت نړیوالې مؤسسې غړیتوب ترلاسه کړ، د یاد سازمان غړي هیوادونه کولی شي، د دې سازمان ارزښتونو ته د رسېدو لپاره له تجربو، دوه اړخیزه تخنیکي او تخصصي همکاریو او ملاتړ څخه برخمن شي.
